دەما پرۆپاگاندایێ یا فەرمی ژ بۆ ھلبژارتنێن گەرا 6 یا پارلامەنتۆیا کوردستانێ ب داوی بوو. د ناڤ یەک یان دو رۆژان دە ھلبژارتن وێ پێک وەرە. بێگومان گەلەک ئالیێن ڤێ پێڤاژۆیا ھلبژارتنێ ھەنە کو دڤێت بهێن نرخاندن.
د دەما پرۆپاگاندایا ھلبژارتنێ دە، ب راستی هەڤپەیمانیەک ل دژی پەدەکێ ھەبوو. واتە چ کەس نە ل دژی ھەڤ بوو، لێ ھەموو کەس ل دژی پەدەکێ بوون. دیارە کو هەڤپەیمانیا ل دژی پەدەکێ بەشەک ژ ئەجیندایا ھێزێن داگیرکەرێن ھەرێمێ یە (ئەم ب بالداری دبێژن نە تەنێ ئیران و ئیراق، بەلکو ترکیە ژی).
لێ بەلێ، مژارەک سەرەکە کو ئەم دخوازن بەحسا وێ بکن ئەوە کو پەکەکێ ھلبژارتن وەک مژارەکا ژیانێ ژ بۆ خوە دبینە و ب ئەشکەرەیی پشتگریا یەنەکێ دکە. ژ بۆ ڤێ یەکێ، وان مەدیایێن خوە و کادرۆیێن خوە وەک پشتەڤانێن ھلبژارتنێ یێن بافل تالابانی ئەرکدار کرنە. ئامەد دیجلە و عەزیز کۆیلووۆغلو ھەول دان کو بنگەھا تەئۆریکا ڤێ یەکێ ئاڤا بکن. نە بەس بوو، ئەندامێن پەیەدێ داخوازا دەنگداینێ ژ بۆ یەنەکێ کرن. ئەڤ ژی نە بەس بوو، رێڤەبەریا کەجەکێ داخویانیەک دا و “ب شێوازەکی شەرمۆکی گۆت دەنگێ خوە بدن یەنەکێ، ھشیار بن نەدن پەدەکێ”.
د راستیێ دە، د ھلبژارتنێ دە ئالیێ کو پەکەکە ب راستی پشتگریێ لێ دکەت نە تەنێ یەنەکەیە، پەکەکە د راستیێ دە پشتگریێ ددە رێڤەبەریا ناڤەندی یا بەغدایێ و چەکدارێن حەشدا شەعبی. پەکەکە رێڤەبەریەکا خورت یا ھەولێرێ وەک ئاستەنگەک ژ بۆ خوە دبینە. سستەمێن تاری یێن وەک سلێمانیێ کو ب ئاوایەکی مافیایی تێن برێڤەبرن و ھەر کەس دکارە ھەر تشتێ خەراب بکە، دەرفەتێ ددە پەکەکێ کو کارێن خوە یێن دەرڤەیی قانوونێ پێک بینە. ژ بەر ڤێ یەکێ، ئارمانجا سیاسی یا پەکەکێ نھا ئەوە کو ئیران، کو د ئەجیندایا وێ دە جھ گرتیە، ل ئیراقێ خورت ببە و بەغدا ژی ل ھەولێرێ خورت ببە. ب ڤی ئاوایی، دێ قادا تەڤگەرێ ژ بۆی پەکەکێ باش ڤەبە.
بێگومان، گەلەک ئالیێن رێکخستنی، ئایدۆلۆژیک و سیاسی یێن پشتگریا پەکەکێ ژ بۆ یەنەکێ ھەنە. لێ ئالیەکی وێ یێ پسکۆلۆژیک ژی ھەیە. راستی ئەڤە کو کەسەکی وەک بافل تالابانی ھەموو سەرۆکاتی و رێڤەبەریێن پەکەکێ پاقژ دکە…
تێ گۆتن کو “چقاس تاوانا بەلاڤ بکن، تاوان ئەوقاس مەعسووم دبن”. د راستیێ دە، پەکەکەیی دخوازن راستیێن خوە ڤەشێرن ب بەلاڤکرنا تاوانێن کو ئەو ب خوە تێکلدارن. میناک، ئەو دخوازن کەسەکی وەک بافل تالابانی وەک سەرۆک ببینن دا کو خاینتیا سەرۆکێ خوە ڤەشێرن. بنێرن، ئەڤ ھەموو کادرۆیێن پەکەکێ درووشمەیا “سەرۆک ئاپۆ، رێبەر ئاپۆ” ددن. ئەو دبێژن کو رامانێن ئۆجالان دێ جیھانێ رزگار بکە: لێ دەما ژ وان تێ پرسین کا چما عەڤدللا ئۆجالان، ھەما کو ل کینیا کریە د بالافرێ دە گۆت “ئەز دخوازم خزمەتا دەولەتا خوە بکم” دەما ژ ئاپۆچییان تێ پرسین کا چما ئۆجالان، ھەتا رۆژا کو ھات گرتن ژ کوردان رە دەولەت دخوەست، لێ پشتی کو ھاتیە گرتن چما گۆت “ئەز ژ بۆی کوردان دەولەتێ ناخوازم”، نکارن بەرسڤەکا بەربچاڤ بدن. لێ بەلێ بەرسڤەک تەنێ ھەیە: ئۆجالان کورد، پارتیا خوە، رێھەڤالێن خوە، ھەموو دۆستێن خوە فرۆتنە دەولەتا ترک.
و ژ دیرۆکێ ھەتا ئیرۆ، واتە ژ سالا 1999 ڤە (ئەم قەت بەحسا دەمێن بەرێ ناکن دا کو مژار درێژ نەبە) ، پەکەکێ و دەولەتا ترکیەیێ ب ھەڤ رە خاینتیا ئۆجالان ڤەشارتیە و وی وەک سەرۆک پێشکێشی کوردان دکن. نھا ھەمان تشت ژ بۆ بافل تالابانی ژی دەرباس دبە. ھەموو پەکەکەیی، د ناڤ دە رێڤەبەری ژی، دزانن کو بافل تالابانی بکارهێنەرەکی مادەیێن ھشبەرە، ھەموو دزانن کو بافل تالابانی مافیایە، ھەموو دزانن کو بافل تالابانی کەرکووک فرۆتیە حەشدا شەعبی. ھەموو دزانن کو بافل تالابانی یێ کو ل سەر دەپێ شانۆیێ وەک کەرەکێ دزرە نکارە سەرۆکاتیێ بکە. لێ ئەو دبینن کو سەرۆک بوونا کوردەکی رزی و کنجرەکی وەک بافل تالابانی دێ خاینتیا وان و یا ئۆجالان ڤەشێرە. واتە ب بافل خییانەتا ئاپۆ ڤەدشێرن. ژ بەر ڤێ یەکێ پەکەکەییان ب چار دەستان خوە ب بافل تالابانی ڤە گرتنە.
ژ بەر کو دەما ئەو سەرۆک مەسعوود بارزانی دبینن، دەما کو وی وەک چاڤکانیەکا باندۆردارا ژ بۆ نەتەوا کوردان قەبوولکری دبینن، ئەو ئۆجالانێ کو “ل دادگەھا ترک ژ مالباتێن لەشکەرێن کوشتی لێبۆرین دخوەست” تینن بەر چاڤێن خوە. دەما کو ئەو دبینن مەسروور بارزانی د جڤینێن ناڤنەتەوەیی دە بەرسڤا پرسا “ھوون خوە چاوا پێناسە دکن؟” ب “ئەز دەستپێکێ کوردم” ددە، ئەو تینن بیرا خوە کو ئۆجالان دگۆت “ئەز لەشکەرەکی ژیر یێ دەولەتا ترکم، ئەز دێ ببم بەلێندەرێ وە، ئەز خوە ژ ھەر ترکەکی پتر ترک دبینم و دیا من ژی ترکە”. مژارێن سیاسی ل کێلەکەکێ، سەرۆکاتیا مرۆڤێن دێرین ب روومەت و ئەسیل روویێ راستین یێ پەکەکێ یێ بێ ئەسل ئەشکەرە دکە.
بێگومان، ژ جەمیل بایک بگرە ھەتا زوبەیر ئایدار، ژ ئامەد دیجلە بگرە ھەتا رەمزی قارتال، ھەموو د ھەمبەر ھەلوەستا ب روومەت و سەرنەتەوی یا بارزانیان دە خاینتیا ئۆجالان تینن بیرا خوە. دەما ل بافل دنێرن، ئەو دبێژن “سەرۆکێ مە ھێژ ژ ڤی چێترە”.
ئەو ب زانەبوون تەڤی کو دزانن بافل کەرکووک فرۆتیە وی دپارێزن، ژ بەر کو ب ڤی ئاوایی ئەو مژارا د ناڤبەرا ئۆجالان-پەکەکێ و میتێ دە یا کو عەفرین د شەڤەکێ دە تەسلیمی ترکان کری، ئاسایی دکن.
ئەو دزانن کو دانانا پاریزگەرەکێ ل کەرکووکێ د ناڤ دەستێن حەشدا شەعبی دە ژ ئالیێ بافل تالابانی ڤە چ زرارێ ددە ھەموو کوردان، لێ ب ڤی ئاوایی ئەو ھەبوونا خوە یا د ناڤ دەستێن حەشدا شەعبی دە ل شەنگالێ ئاسایی دکن.
بەلێ، د بنێ ھێرسا پەکەکێ یا ل ھەمبەر بارزانی و ئەڤینا وان ژ بافل تالابانی رە نە تەنێ سەدەمێن سیاسی، رزیبوونا وان، لێ ھەروھا باندۆرا پسکۆلۆژیەکا وھا، خوەپەرەست و ئەزئەزی ژی ھەیە.
