ئیسرایلێ کوشتنا یەحیا سینوار راگەھاند

 ئارتێشا ئسرایلێ کوشتنا سەرۆکێ بزاڤا حەماسێ یەحیا سینوار د ئۆپەراسیۆنەکا خوە یا ل سەر کەرتێ غەززەیێ دە راگەھاند. کانالا 13 یا ئیسرایلی ژی ئەشکەرە کر کو، ناڤبری ل دەڤەرا تل سولتانێ یا رەفەحێ ھاتیە کوشتن.

چەند چاڤکانیان ئیرۆ (پێنجشەمبێ، 17/10/2024) ژ کانالا حەدەسێ رە راگەھاند کو، پشکنینا دەستپێکێ یا DNAیێ ژ بۆ وی تەرمی ھاتن کرن، کو گۆمان دھات کرن سەرۆکێ بزاڤا حەماسێ یەحیا سینوار بە، و ئەنجاما وێ پشکنینێ ژی ئەرێنی بوو.

ھەر ئیرۆ ئارتێشا ئیسرایلێ ژی راگەھاند، “یەحیا سینوار د ئۆپەراسیۆنەکێ دە ل کەرتێ غەززەیێ ھات کوشتن.” ھەروەسا کانالا 13 یا ئیسرایلی ژی ئەشکەرە کر کو، سینوار ل دەڤەرا تل سولتانێ یا رەفەحێ ھاتیە کوشتن.

ھەروەسا دەستەیا پەخشێ یا ئیسرایلێ و رادیۆیا ئارتێشا ئیسرایلێ ژی کوشتنا یەحیا سینوار پشتراست دکن.

ئیرۆ بالافرێن شەری یێن ئیسرایلێ ئێریشەک کر سەر کەمپەکێ، کو ئاوارەیێن جەبەلیایا باکورێ کەرتێ غەززەیێ لێ ئاکنجی نە، و ب کێمی ڤە 22 کەس کوشتن و ب دەھان کەس ژی بریندار کرن.

ئارتێشا ئیسرایلێ ژ ئالیێ خوە ڤە راگەھاند، “مە ئێریشەکا توند کر سەر جڤینا حەماس و جیھادا ئیسلامی ل ناڤ کەمپەکێ ل باکورێ غەززەیێ، کو پێشتر دبستان بوو.” ئاماژە ژی دا، “ب دەھان چەکدارێن حەماسێ ل جھێ وێ ئارمانجێ بوون.”