سەرۆکێ گشتی یێ جەهەپێ ئیرۆ سەردانا سەلاحەدین دەمیرتاش دکە. پشتی ھەڤدیتنێ، پەیاما دەمیرتاش بۆ رایا گشتی دێ وەرە ئاشکەرەکرن.
سەرۆکێ گشتی یێ جەهەپێ ئۆزگور ئۆزەل ئیرۆ چوویە زیندانا ئەدیرنەیێ دا کو ھەڤسەرۆکێ بەرێ یێ ھەدەپێ سەلاحەدین دەمیرتاش و شارەدارێ بەرێ یێ دیاربەکرێ سەلچوک مزراکلی ببینە.
ئۆزگور ئۆزەل پێشتر ژ وەزارەتا دادێ یا ترکیەیێ خوەستبوو کو رێ پێ بدن سەردانا دەمیرتاش بکە. وەزارەتێ ژی ب ئەرێنی بەرسڤا ئۆزەل دا.
ل گۆر زانیاریان، پارێزەرێن دەمیرتاش دێ مژارێن کو دەمیرتاش ئامادە کربوون، بەریا سەردانێ، رادەستی ئۆزگور ئۆزەل بکن کو ب رایا گشتی رە بێ پارڤەکرن.
سەرۆکێ گشتی یێ جەهەپێ ئۆزگور ئۆزەل، پشتی ھەڤدیتنێ تەڤی شاندەکا بلندا جەهەپی دێ سەردانا دیاربەکرێ بکن. ھەروھا شاندا جەهەپێ د چارچۆڤەیا چارەسەریا پرسا کورد دە، سەردانا حەفت باژارێن باکورێ کوردستانێ دکە.
ب دەستپێشخەریا دەولەت باخچەلی و سەرۆککۆمارێ ترکیەیێ رەجەب تەیب ئەردۆگان، بۆ دیالۆگێ گاڤ ھاتبوو ئاڤێتن و ئەڤ یەک وەک دەستپێکرنا پرۆسەیەکا نوو یا چارەسەریا پرسا کورد ھاتبوو بناڤکرن.
