وەزیرێ دەرڤەیێ ئامەریکا دیسا بەر ب رۆژهلاتا ناڤین ڤە ب رێ کەت. پێشنیارەکە ئیسرائیلێ یا نوو ژی ژ بۆ ئاگربەستا ل غهززەیێ هەیە.
وەزیرێ دەرڤەیێ ئامەریکا ئانتۆنی بلنکێن دوهی دانێ ئێڤارێ دوشەمێ بەر ب رۆژهلاتا ناڤین ڤە برێ کەت. ئیسرائیل ژی راوەستگەها یەکەما سەردانا بلنکێن نه، تێ چاڤەرێکرن کو ئەو سەردانا قەتەر، مسر، ئوردن و هەژمارەک وەلاتێن دن یێن ناڤچەیێ بکە.
وەزارەتا دەرڤە د داخویانیەکێ دە گۆت، بلنکێن دبە کو هەتا رۆژا ئینێ 25ێ جۆتمەهێ ل رۆژهلاتا ناڤین بمینە. دا زانین ژی: بلنکێن و رایەدارێن ناڤچەیێ دێ ل سەر گرینگیا بداویکرنا شەرێ ل غهززەیێ، ئازادکرنا هەموو دیلان و سڤککرنا ئێش و ئازارێن گەلێ فلستینێ گۆتووبێژان بکن.
وەزارەتێ گۆت ژی: پێڤاژۆیا پشتی شەرا ل خەزەیێ و دیتنا عچارەسەریەکە دیپلۆماتیکع ژ رەوشا نها یا لبنانێ رە، دێ وەرە گۆتووبێژکرن.
ژ دەستپێکا شەرێ د ناڤبەرا حەماس و ئیسرائیلێ د 7ێ جۆتمەهێ دە، ئەڤ 11مین سەردانا وەزیرێ دەرڤەیێ ئامەریکایێ بۆ رۆژهلاتا ناڤینە. هەروها تەنێ سێ هەفتەیان بەری هلبژارتنێن سەرۆکاتیا دەولەتێن یەکبوویی یێن ئامەریکی تێ کو بریارە د مەها بێ دە وەرە کرن.
ئاگربەست ل هەمبەر ئازادکرنا هەژمارەک دیل
ل گۆر زانیاریێن دەزگەها وەشانێ یا ئیسرائیلێ، سەرۆکێ دەزگەها ئەولەکاریا گشتی یا وی وەلاتی (شاباک) رۆژا یەکشەمێ پێشنیارەکە نوو پێشکێشی حکوومەتا شەر و سەرۆکوەزیر بنیامێن نەتانیاهو کر بۆ راوەستاندنا دەمکی یا شەر ل غهززهیێ و ئازادکرنا هەژمارەک ژ دیلێن کو د دەستێ حەماسێ دە نە.
ل گۆری هەمان چاڤکانیێ، ئەڤ پێشنیار ژ «ئاگربەستا چەند رۆژان ل غهززهیێ، ل هەمبەر ئازادکرنا هەژمارەک ژ دیلێن ئیسرائیلی یێن د دەستێ حەماسێ دەنە، پێک تێ»، بێی ڤەکشاندنا ئارتێشا ئیسرائیلێ ژ وێ دەڤەرێ.
ئاماژە ب وێ ژی کر، نەتانیاهو ئەڤ پێشنیار قەبوول کریە و سەرۆکێ ئاژانسا ئەولەکاریا گشتی راسپاردایە کو سەردانا قاهیرەیێ بکە و ڤێ پێشنیارێ ب رایەدارێن مسرێ رە گۆتووبێژ بکە.