ئامەریکا، فرانسا و بریتانیا پێشوازیێ ل هلبژارتنێن پارلامەنتۆیا کوردستانێ دکن و داخوازا دەستپێکرنا زوو یا پارلامەنتۆیێ و پێکانینا کابینەیا نوو دکن.
بالیۆزا ئامەریکایێ ل ئیراقێ ئالنا رۆمانۆوسک د بەیاننامەیەکێ دە، ب هەلکەفتا بسەرکەفتنا هلبژارتنێن گەرا شەشێ یا پەرلەمانتۆیا کوردستانێ، پیرۆزباهی ل خەلکێ کوردستانێ و پارتیێن سیاسی کر.
ئالنا رۆمانۆوسک گۆت، «کارمەندێن شاندیا ویلایەتێن یەکگرتییێن ئامەریکایێ ل ئیراقێ چاڤدێریا دەنگدانێ ل بنگەهێن دەنگدانێ ل سەرانسەری هەرێما کوردستانێ کر».
بالیۆزا ئامەریکایێ ل ئیراقێ هەروەسا دەستخوەشی ژی ل خەلکێ هەرێما کوردستانێ کر، ژ بۆ پابەندبوونا وان ب پرۆسەیا دەمۆکراسی.
بالیۆزا ئامەریکایێ داخوازا پێکانینا حکوومەتێ بێ دەرەنگکەتن کر و گۆت: «پێکانینا حکوومەتا نوو رێیێ ژ بۆ حکوومەتا هەرێما کوردستانێ خوەش دکە کو، دەزگەهێن خوەیێن دەمۆکراسی بهێز بکە، مافێن مرۆڤان پێش ڤە ببە، بەردەوامیێ ب پێشخستنا ئابۆری بدە و هەرێما کوردستانا ئیراقێ وەک بەشەک ژ ئیراقەکە ئارام، ب ئیستیقرار و خوەدی سەروەری بهێزتر بکە».
فرانسا: ئەم ژ بەشداریا بەرفرەها دەنگدانێ دلخوەشن
بالیۆزێ فرانسایێ ل ئیراقێ پاترجک دوڕەڵ ل هەژمارا خوەیێ فەرمی ل سەر تۆرا جڤاکی «X» نڤیسی: « بالیۆزخانەیا فرانسا پێشوازی ل برێڤەچوونا هلبژارتنێن یاسایی یێن هەرێما کوردستانێ د 20ێ جۆتمەهێ دە دکە».
هەروها دوڕەڵ گۆت: «ئەڤ دەنگدان، گاڤەکە سیاسی یا گرینگە ژ بۆ هەرێما خوەبرێڤەبر و ئیراقێ ب گشتی».
بریتانیا داخوازا پێکانینا حکوومەتا زوو دکە
کۆنسولخانەیا گشتی یا بریتانیایێ ل هەولێرێ ب داخویانیەکێ ل سەر تۆرا جڤاکی «X»، پێشوازی ل هلبژارتنێن پارلامەنتۆیا کوردستانێ کر.
کۆنسولخانەیا بریتانیایێ گۆت: «رێژەیا بلندا بەشداربوونێ، پەیامەک خورت ژ بۆ پشتگریکرنا نووکرنا رەوابوونا دەمۆکراتیکە».
هەروها گۆت: «ئەم ل بەندێنە کو د زووترین دەم دە پارلامەنتۆ وەرە ڤەکرن و حکوومەتا هەرێما کوردستانێ بێ ئاڤاکرن».
هلبژارنێن پارلامەنتۆیا کوردستانێ
رۆژا ئینێ 18ێ جۆتمەهێ دەنگدانا تایبەت و رۆژا یەکشەمێ 20ێ جۆتمەهێ ژی دەنگدانا گشتی یا خولا شەشەمینا پارلامەنتۆیا کوردستانێ برێڤە چوو. ل گۆری کۆمیسیۆنا بلندا سەربخوە یا هلبژارتنانا ئیراقێ، رێژەیا بەشداریێ د هەر دو هلبژارتنان دە، ب گشتی %70 بوو.
