سەرۆکێ گشتی یێ مەھەپێ دەولەت باخچەلی پشتی کو بانگ ل عەبدوللا ئۆجالان کربوو و گۆتبوو “رێخستنا خوە تەسفیە بکە” نھا ژی بانگەک نوو کر. باخچەلی گۆت، “ئەگەر تەجرید رابە، بلا وەرە و د جڤینا کۆما پارتیا دەمێ یا ل پارلەمەنتۆیا ترکیێ دە باخڤە و بقیرە کو تەرۆر ب تەمامی قەدیایە و رێخستن ژ ھۆلێ ھاتیە راکرن.”
سەرۆکێ گشتی یێ مەھەپێ گۆت، “ئەگەر ڤێ زیرەکی و ئیرادەیا خوە نیشان بدە، دڤێت رێ ل بەر رێزکنامەیا قانوونی بێ ڤەکرن و ژێ سوودێ وەربگرە. نە قەندیل نە ژی ئەدیرنە؛ ناڤنیشان ژ ئیمرالیێ ھەتا دەمێ درێژ دبە و مژارا تەرۆرێ ب تەمامی ژ رۆژەڤا وەلات بێ دەرخستن. پرسگرێک ئەڤە، ئەز دبێژم کەرەمبکن، ئەم ژ بۆ ڤێ ئامادە نە.”
ئەڤ داخویانیا باخچەلی وەکە بۆمبەیەکێ کەت ناڤا رۆژەڤا سیاسی. نرخاندنەک ژی د دەربارێ داخویانیا باخچەلی دە ژ سەرۆکۆمارێ ترکیێ ئەردۆگان ھات.
ئەردۆگان د جڤینا سەرۆکێن پارێزگەھان یا بەرفرەھا پارتیا خوە دە ئاخڤی و گۆت، “ئەم ھێڤی دکن کو ھەر کەس بزانبە کو د پێشەرۆژا ترکیەیێ دە جھێ تەرۆرێ نینە. ئەم دخوازن ئەڤ پەنجەرەیا دیرۆکی یا ڤەکری نەبە قوربانیا بەرژەوەندیێن شەخسی. ئەم دخوازن ترکیەیەکا کو جھێ تەرۆرێ لێ نەبە ئاڤابکن.
