پشتی رۆژەکێ ژ راگەھاندنا ئارتێشا ئیسرایلێ کو ھاشم سەفیەدین کوشتیە، ئیرۆ حزبوللاھا لبنانێ ژی کوشتنا وی بەرپرسێ خوەیێ بلند پشتراست کر.
حزبوللاھا لبنانی ئیرۆ (چارشەمبێ، 23/10/2024) د راگەھاندنەکێ دە کوشتنا ھاشم سەفیەدین پشتراست کر و ئاماژە دا، “ئەم شینیێ ژ بۆ وەخەرا داویێ یا وی سەرکردەیێ بلند دکن، کو ب دەستێ ھێزێن ئیسرایلێ ھات کوشتن.”
دھات چاڤەرێکرن کو ھاشم سەفیەدین ببە جیگرێ نەسروللا و وەکی سکرتێرێ گشتی یێ بزاڤا حزبوللاھا لبنانی دەست ب کاری بکە.
ئارتێشا ئسرایلێ دوھی (سێشەمبێ، 22/10/2024) راگەھاند کو، ھاشم سەفیەدین د ئێریشەکا ئاسمانی دە ل رۆژا 4 ڤێ مەھێ ل باشوورێ بەیرووتێ ھاتیە کوشتن.
ئاماژە ژی دا کو، 25 بەرپرسێن بلندێن حزبوللاھێ ھەر د وێ ئێریشێ دە ھاتنە کوشتن، کو بەرپرسێ ئیدارەیا ھەوالگریا ئەولەھیا وێ کۆمێ حسێن عەلی ھەزیمە ژی د ناڤ وان دە بوو.
