سەرۆکێ گشتی یێ پارتییا وەلاتپارێزێن کوردستانێ (PWK) موستەفا ئۆزچەلیک دبێژە: “دڤێت نە ژ بۆ مژوولکرنێ، لێ ژ بۆ چارەسەرییەکا راستەقینە گاڤێن پێویست بێنە ئاڤێتن و ھەموو ئالییێن کوردان مخەتاب بێنە گرتن.”
سەرۆکێ گشتی یێ PWK ئیرۆ 24 جۆتمەھێ داخویانیەک دەربارێ پێشھاتێن داویێ یێن ل ترکیەیێ و ئەگەرا دەستپێکرنا پێڤاژۆیەکە نوو یا چارەسەریێ دە بەلاڤ کر و تێ دە ھەژمارەک خال و گاڤێن کو پێویستە وەک دەستپێک بێنە ئاڤێتن راگھاندن.
داخویانیا سەرۆکێ گشتی یێ PWKێ:
داخویانی و گۆتنێن سەرۆکێ مەھەپێ دەولەت باخچەلی نیشانا وێ یەکێیە کو د مەتبەخا دەولەتا ترکییەیێ دە خوارنەک تێ کەلاندن؛ لێ نھا نە دییارە کا ئەڤ خوارن چییە؟ دەولەت باخچەلی، ھەتا مەھەکە بەرێ ژی دگۆت “دڤێت دەم پارتی بێ داخستن و ئۆجالان بهێت سیدارەدان”؛ لێ نھا دبێژە “عەبدوللا ئۆجالان وەرە پارلامەنتۆیا ترکییەیێ و باخڤە” ئەڤە جیھێ سەرنجێ یە و نیشانا پلانەکە نوویە. ھەروەھا دییارە کو ئەڤ پلان نە بەس یا دەولەت باخچەلی تەنێیە؛ ئەڤ پلان، پلانا ھەڤبەشا سەرۆککۆمارێ ترکییەیێ رەجەب تەییب ئەردۆگان، دەولەت باخچەلی و رایەدارێن دەولەتا ترکییەیێ یە. لێ بەلێ، پر زەلالە کو د گۆتنێن دەولەت باخچەلی دە ژ بۆ مافێن نەتەوەیی، دەمۆکراتیک یێن ملەتێ کورد چ تشت تونەیە. دەولەت باخچەلی بەحسا “پێڤاژۆیەکە چارەسەرییێ یا نوو” ژی ناکە، بەس دبێژە “بلا ئۆجالان بانگی پەکەکێ بکە دا کو چەکان دەینن و بلا پەکەکە بهێت هەلوەشاندن” و بەحسا سست کرنا تەجریدا ل سەر ئۆجالانی و گوھەرتنا یاسایا سێدارەدانێ تێ کرن.
دییارە کو دەولەتا ترکییەیێ پشتی روودانێن ڤێ داوییێ یێن ل رۆژھلاتا ناڤین، کەتییە ناڤ ترس و خۆفەکێ کو دکارە ئەڤ روودانە کارتێکرنەکا نەرێنی ل وێ بکە. دەولەتا ترکییەیێ، ژ خوە د ناڤ قەیرانەکا مەزن یا ئابۆری، سیاسی، جڤاکی و دیپلۆماتیک دەیە؛ ڤان روودانێن ل رۆژھلاتێ ناڤین دێ ڤێ قەیرانێ کوورتر بکە و دکارە ببن سەبەبێ گوھەرتنێن مەزن ژی. دەولەتا ترکییەیێ ژ وێ یەکێ دترسە کو روودانێن نھا یێن ل رۆژھلاتا ناڤین دکارە رێ ل وێ یەکێ ڤەکە کو ل باشوورێ کوردستانێ دەستکەفتنێن فەدەرە پێشدەتر بچن و بگھێژە ئاستەکە دن؛ ل رۆژئاڤایێ کوردستانێ رەوشا نها ب تفاقا ھێزێن کوردان بەر ب دەستکەفتنەکە گشتی یا کوردێن رۆژئاڤایێ کوردستانێ ڤە ھەرە؛ ل رۆژھلاتێ کوردستانێ ب لاوازبوونا دەولەتا ئیرانێ، گەلێ مەیێ رۆژھلاتێ کوردستانێ دکارە ھندەک دەستکەفتنێن ملی، دەمۆکراتیک، ستاتویەکە سییاسی بدەست بخە. ئەو بوویەر و پێشکەتن، بڤێ نەڤێ دێ تەسیرەک مەزن ل باکورێ کوردستانێ ژی بکە.
ژ بەر ڤێ راستییێ و ڤێ ترسێ، دەولەتا ترکییەیێ نھا وەک کو خوە ژ ئیحتیمالا باھۆزەکێ بپارێزە، دخوازە ھندەک تەدبیران وەربگرە؛ ئەو دخوازە ھەم رێ ل بەر دەستکەفتنێن ھەرسێ پەرچەیێن دن یێن کوردستانێ بگرە، ھەم ژی نەھێلە ئەو پێلا باھۆز و تسوونامییێ بگھێژە باکورێ کوردستانێ کو کورد ماف و ئازادییێن خوەیێن نەتەوەیی، دەمۆکراتیک بدەست بخن.
سییاسەت و ھەلوەستێن ئاک پارتی، مەھەپێ و ب گشتی دەولەتا ترکییەیێ یێن ھەتا ئیرۆ ل بەر چاڤانە؛ لێ ئەمێ پشتگرییێ بدن ھەر گاڤەکێ کو شەر و ئۆپەراسیۆنێن لەشکەری یێن دەولەتا ترکییەیێ و چالاکییێن چەکداری یێن پەکەکێ راوەستنین و رێیا چارەسەرییا سڤیل، دەمۆکراتیک و سییاسی ڤەکن. لێ نە راستە کو مەسەلە بەس ب “مافێ ئومیدێ”، یان ژی ب رەوشا ئۆجالان ڤە بێ سنووردار کرن.
پرس، نە پرسا شەخسەکی یان پارتییەکێیە، نە ژی تەنێ پرسا راوەستاندنا شەرییە. پرس، پرسا مافێن نەتەوەیی، دەمۆکراتیکێن ملەتێ کوردە؛ پرسا کورد و کوردستانێیە.
لێ بەلێ ھەلبەت کو چارەسەرییا ڤێ پرسێ دکارە ژ جیھەکی بێ دەستپێ کرن. ژ بەر ڤێ راستییێ ژی ئەم بانگی دەولەتا ترکیەیێ دکن دا کو ڤان تەجروبەیێن خوەیێن 100 سالی بدن بەر چاڤان و ل جیھێ پلانێن کو دێ پرسگرێکان دژوارتر و کوورتر بکن و ژ ھشمەندییەکە مژوولکرنێ دوور، گاڤێن راستەقین و ماقوولێن کو دێ رێیا چارەسەرییێ ڤەکن باڤێژن.
ئەم دبێژن ژ بۆ رێ ل چارەسەرییەکە سڤیل، سییاسی، دەمۆکراتیک بێ ڤەکرن، دڤێت وەکە دەستپێک ئەڤ گاڤ بێنە ئاڤێتن:
– دڤێت رێز ل ماف و ئازادییێن ھەموو کەسێن کو د زندانێ دە نە بێ گرتن و دڤێت ھەموو کەسێن کو ژ بەر فکرێن خوە و ژ بەر خەباتێن خوەیێن سییاسی سزا خوارنە و د زندانی دە نە، بێنە ئازاد کرن. ژ بۆ ڤێ ئارمانجێ ژی دڤێت گوھەرتنێن یاسایی بێنە کرن.
– دڤێت دەولەتا ترکییەیێ ھەموو ئۆپەراسیۆنێن خوەیێن لەشکەری و شەرێ ھەیی راوەستینە، دەست ژ گرتن و نەحەقییان بەردە؛ ھەروەھا دڤێت پەکەکە ژی داویێ ل ھەموو چالاکییێن خوەیێن چەکداری یێن ل باکور و باشوورێ کوردستانێ بینە.
– دڤێت دەولەتا ترکییەیێ ھەموو پارتییێن کوردان، دەزگەھێن سڤیلێن ل کوردستانێ و کەسایەتێن قەبوولباریێن جڤاکی، ژ بۆ گوفتوگۆ کرن و چارەسەرییا پرسگرێکان مخاتەب بگرە.
– دڤێت ناسنامەیا کوردی، پەروەردەیا ب زمانێ کوردی و فەرمیبوونا زمانێ کوردی و ئازادییا رامانی و رێخستنی بێنە قەبوول کرن و د قانوونا بنگەھین یا ترکییەیێ دە بێنە گارانتی کرن.
– دڤێت قەدەغەیێن ل سەر ناڤێ کوردستانێ رابن و قانوونا بنگەھین و ھەموو یاسایێن دەولەتا ترکییەیێ ل گۆری پەیمانێن ناڤنەتەوەیی یێن کو دەولەتا ترکییەیێ ئیمزە کرن ژ نوو ڤە بێنە نڤیساندن و قەبوول کرن.
ژ بۆ کو ئەڤ پێڤاژۆ ب راستی ژی ببە دەستپێکا چارەسەرییەکە سییاسی، دەمۆکراتیک ھەلبەتە کو دڤێت ئەم ژ ھەر دییالۆگ، گوفتوگۆیا ل گەل دەولەتا ترکییەیێ، ل گەل پارتییێن دەستھلات و ئۆپۆزسیۆنێ ڤەکریبن. لێ، دڤێت ھەموو پارتییێن کوردان، دەزگەھێن سڤیلێن ل کوردستانێ و کەسایەتێن قەبوولبار یێن جڤاکی بزانبن ھەگەر کو ئەم چارەسەرییا مەسەلەیا خوە بەس حەوالەیی ئینسییاتیفا دەولەتا ترکییەیێ، ئاک پارتی، مەھەپێ، جەهەپێ و پارتییێن دن بکن و ئەم بەس ل ھێڤییا وان بھێلن، دیرۆکێ ئیسپات کرییە کو چ ئەنجام ژێ دەرناکەڤە و دێ رەوش خەرابتر ببە.
ژ بەر وێ ژی دڤێت وەک دەستپێک، ل سەر بەرنامەیەکە کو ژ داخوازێن بلەز یێن ملەتێ کورد پێک ھاتییە، بەرییا ھەر تشتی دڤێت ئەم ھەموو پارتییێن کوردان، دەزگەھێن سڤیلێن ل کوردستانێ و کەسایەتێن قەبوولبار یێن جڤاکی ھێزا خوە بکن یەک و ب ڤان داخوازێن کو مە ل ژۆرێ دەستنیشان کرنە ببن مخاتەبێ دەولەتا ترکییەیێ. ھەگەر ئەم ب ھێزا گەلێ خوە، یەکگرتی بن و ئەم ل ھمبەری ھندەک خاپاندن و لیستۆکان ھشیار بن، ئەم دێ بکاربن رێیا سەرکەفتنێ باشتر و خورتر بکن، ئەم دێ بکاربن وەک نوونەرێن گەلێ خوە ببن مخاتەبێ چارەسەرییێ. ژ بۆ ڤێ یەکێ ژی نابە کو بەس کەسەک یان ئالییەک تەنێ ببن مخاتەبێ ڤێ مەسەلەیێ و مەسەلە ژ راستی و زەمینا چارەسەرییا ماف و ئازادییێن ملی، دەمۆکراتیک یێن ملەتێ کورد بێ دوور خستن. ھەروەھا، دڤێت ئەم وەک ئالییێ کوردان، ل گەل ھەموو ئالییێن کو پشتگرییا مافێن نەتەوەیی، دەمۆکراتیکێن ملەتێ کورد دکن؛ ئازادییێ، ئاشتییێ و دەمۆکراسییێ دپارێزن رە د ناڤ دییالۆگ و ھەڤخەباتێ دە بن.
