ژ بەر ئێرشێن ترکیەیێ یێن ل رۆژئاڤایێ کوردستانێ، ئەلەکتریک ل سەر ناڤەندا کۆبانێ و 366 گوندێن وێ ھاتیە برین.
ژ شەڤا 23 جۆتمەھێ ڤە ئارتێشا ترکیەیێ ب درۆنان و فرۆکەیێن شەری ناڤچەیێن جودایێن رۆژئاڤایێ کوردستانێ بۆمبەباران دکە، د ئەنجامێ دە 17 کەس ھاتن کوشتن، 48 کەس بریندار بوون و ھەژمارەک ژ سازیێن خزمەتگوزاریێ ژ خزمەتێ دەرکەتن.
ل گۆری ھەڤسەرۆکا دەستەیا ئەنەرژیێ یا کۆبانێ عایشە ناسر، فرۆکەیێن ترکیەیێ وێستگەها ئەلەکتریکێ یا باژارێ کۆبانێ کر ئارمانج، ب وێ رە ئەلەکتریک ل سەر 366 گوند و ناڤەندا باژێری ھات برین.
عایشە دیار کر کو ژ بەر دەرکەتنا وێستگەها ئەلەکتریکێ ژ خزمەتێ، بیرێن ئاڤێ ژی سەکنین، ل کێلەکا وێ ژی جھێن ستراتەژیکێن ل باژارێ کۆبانێ ب تەمامی سەکنین.
عایشە ل سەر ئاستا زرارا کو گھیشتیە وێستگەهێ دیار کر، ژ بەر فرینا بێناڤبەرا فرۆکەیێن ترکیەیێ ل ئاسیمانێ ھەرێمێ و ئێرشێن وێ، تیمێن تایبەت نکارن خوە بگھیژن وێستگەهێ و زراران بنرخینن.
ئارتێشا ترکیەیێ ل کێلەک بۆمبەبارانکرنا وێستگەها ئەلەکتریکێ، فرنا ئۆتۆماتیکا باژارێ کۆبانێ بۆمبەباران کر و زرارێن مادی چێبوون، ھەر وھا مەخزەنێن دەخلوودانان ل گوندێ رۆڤی ژی ھات ئارمانجکرن.
