ئیسرایلێ ب مووشەکان ل چەند خالێن لەشکەری ل دەردۆرا حەلەب و ئدلبێ دا، د ئەنجامێ دە ژی ھەژمارەک لەشکەر و چەکدار بریندار بوون.
ئاژانسا فەرمی یا سووریەیێ “سانا” ل سەر زارێ ژێدەرەکی لەشکەری بەلاڤ کر، ئارتێشا ئیسرایلێ ئیرۆ 9 مژدارێ دەمژمێر 00:45 ئێریشی ھەژمارەک خالێن لەشکەری ل گوندەوارێ حەلەب و ئدلبێ کر.
دا زانین ژی، د ئەنجاما ئێریشێ دە ھەژمارەک لەشکەر بریندار بوون و زیانێن مادی یێن مەزن گھیشتن وان خالان.
ژ ئالیێ خوە ڤە، رەوانگەھا سووری یا مافێن مرۆڤان بەلاڤ کر، ئیسرایلێ خالەکە رێژیما سووریەیێ ل باژارۆکێ سەراقبێ یێ سەر ب ئدلبێ ڤە بوومبەباران کر کو چەکدارێن حزبوللاھا لبنانی لێ بجھ دبن. د ئێریشێ دە لەشکەرەک ھات کوشتن و 6 لەشکەر ژی بریندار بوون.
رەوانگەھێ ئاماژە ب وێ ژی کر، فرۆکەیێن ئیسرایلێ ناڤەندا لێکۆلینێن لەشکەری یا ل نێزیک باژارۆکێ سفیرە ل باشوورێ حەلەبێ بۆمبەباران کر و تەقینێن بھێز تێ دە چێبوون. ھەروھا 8 کەس ژی بریندار بوون.
ل گۆری زانیاریێن رەوانگەھێ، ئیسرایلێ ژ دەستپێکا ئیسال ڤە 142 جاران خاکا سووریەیێ کریە ئارمانج، تێ دە 257 ئارمانج وێران کرنە و 275 لەشکەر و چەکدار کوشتنە و 218 ژی بریندار بوونە. ھەروھا 51 سڤیل ھاتنە کوشتن و 58 سڤیل ژی بریندار بوونە.
