ب بەشداریا سەرۆکێ هەرێما کوردستانێ نێچیرڤان بارزانی، کۆنفەرانسا گوهەرتنا کەشوهەوایێ یا جیهانی (COP29) ل باژارێ باکو یێ ئازەربایجانێ دەست پێ کر.
بەردەڤکێ سەرۆکایەتیا هەرێما کوردستانێ دلشاد شەهاب د داخویانیەکێ دە راگهاند، «ل سەر ڤەخوەندنا فەرمی یا سەرۆکێ ئازەربایجانێ ئیلهام ئالیەڤ، سەرۆکێ هەرێما کوردستانێ نێچیرڤان بارزانی ژ بۆ بەشداریکرنا د کۆنفەرانسا نەتەوەیێن یەکگرتی یا ژ بۆ گوهەرتنا کەشووهەوایێ (COP29) چوو باکو، پایتەختا ئازەربایجانێ».
هەروها گۆت: نێچیرڤان بارزانی دگەل سەرۆک و سەرکردەیێن جیهانێ دێ رۆژا سێشەمێ بەشداریا مەراسما ڤەکرنا کۆنفەرانسێ ببە کو ژ بۆ گۆتوبێژکرنا پرسگرێکێن ژینگەهێ و کێشەیێن ژ ئەنجامێن گوهەرینا کەشوهەوایێ تێ لدارخستن.
بریارە وەلاتێن بەشدار ئارمانجەک نوو یا دارایی یا کەشوهەوای یا سالانە دەستنیشان دکن کو د سالا 2009ان دە لهەڤکرنەک 100 میلیار دۆلاری دابوون. گەلەک ژ ڤان وەلاتان دبێژن، ئەو برێ پەرەیان پر کێمترە ژ یا کو ژ بۆ مژوولبوونا ب گوهەرینا کەشوهەوایێ و گەرمبوونا گەردوونی رە هەوجە دکە.
سەکرەتەرێ جیبجیکارێ پەیمانا چارچۆڤە یا نەتەوەیێن یەکبوویی یا ل سەر گوهەرتنا کەشوهەوایێ سیمۆن سیلی دوهی د ڤەکرنا کۆنفەرانسێ دە، بانگا ئارمانجەک نوو یا مەزن ژ بۆ فینانسمانا کەشوهەوایێ کر و تەکەز کر، ئەڤ یەک دێ ب کێری هەموو وەلاتان بە.
گۆت: «گوهەرینا کەشووهەوا باندۆرێ ل هەر کەسێ ل جیهانێ دکە». هەروها گۆت: «ئەز ژ مە دپرسم کو ئەم ژ ڤێ فکرێ دەرکەڤن کو فینانسەکرنا کەشوهەوا خێرخوازیەکە».
