پشتی کو بەرپرسێن ئامەریکایێ پشتراست کر کو سەرۆکێ ئامەریکایێ جۆ بایدن دەستھلات دایە ئوکراینایێ کو مۆشەکێن ATACMS ب کار بینە، ئاژانسا بلۆمبەرگێ یا نووچەیان پارڤە کر “ھێزێن سەربازی یێن ئوکراینایێ ل دەڤەرەکە سنۆری ل ناڤ ئاخا رووسیایێ ئێریشا یەکێ ب وێ مۆشەکا دوورمەودا کر.”
د بەرسڤا ئیدارەیا جۆ بایدن دە کو رێ دایە ئوکراینایێ چەکێ چێکری یێ ئامەریکایێ ب کار بینە، بەلگەنامەیەک کو ل سەر مالپەرا حکوومەتا رووسیایێ ھاتیە پارڤەکرن ئەشکەرە دکە کو، سەرۆکێ رووسیایێ ڤلادیمێر پوتین ئیرۆ (سێشەم، 19/11/2024) قانوونا بکارئانینا چەکێ ئەتۆمی پەژراندیە.
چەند ھەفتیان بەری ھلبژارتنێن سەرۆکاتیا ئامریکایێ، پوتین فەرمان دا کو گوھەرتن د قانوونا بکارئانینا چەکێ ئەتۆمی دە بێ کرن، ب وی شەرتی کو ھەر ئێریشەکا ئاسایی کو ل سەر رووسیایێ ب ئالیکاریا وەلاتەکی خوەدی چەکێ ئەتۆمی بێ کرن، ممکنە وەکی ئێریشەکە ھەڤپار بۆ سەر رووسیایێ بێ حەسباندن.
د وێ فەرمانا سەرۆکاتیێ دە ھاتیە، “ب ئارمانجا باشترکرنا سیاسەتا رووسیایێ د وارێ خوەپاراستنا ئەتۆمی دە، ئەز بریارێ ددم بەلگەنامەیەکێ کو بنگەھێن سیاسەتا وەلاتێ فەدەراسیۆنا رووسیایێ نە د وارێ بەرسڤدانا ئەتۆمی دە بپەژرینم.”
ئەو بریار ژ ئیرۆ (سێشەم، 19/11/2024) ڤە تێ بجھانین.
قانوونێن ئەتۆمی یێن رووسیایێ پشتراست دکن کو سیاسەتا وەلاتی د وارێ بەربەستدانانا ئەتۆمی دە سروشتەک بەرگریکارانە ھەیە، ھەروەسا رووسیا ھەمی بزاڤێن پێدڤی ژ بۆ کێمکرنا گەفێن ئەتۆمی دکە، چەکێ ئەتۆمی وەکی ئالاڤەکی بەرسڤدانێ دبینە و بکارئانینا وی چەکی وەکی ھلبژارتنا داویێ دبینە.
رۆژنامەیا نیو یۆرک تایمس پارڤە کریە، “بەرپرسێن ئامەریکایێ ئەشکەرە کر کو، جۆ بایدن ژ بۆ جارا یەکێ رێ ب ئوکراینایێ دا کو مۆشەکێن دوورمەودا، کو ژ ئالیێ ئامەریکایێ ڤە ھاتبوون دابینکرن، ژ بۆ دەستپێکرنا ئێریشێ بۆ ناڤ رووسیایێ ب کار بینە.
ئاماژە ژی دا کو، ممکنە ئەو چەک ل دەستپێکێ ل دژی ھێزێن رووسیایێ و کۆرەیا باکور بێن بکارئانین، ژ بۆ بەرگریکرنێ ژ ھێزێن ئوکراینایێ ل دەڤەرا کورسکێ ل رۆژئاڤایا رووسیایێ.
ھەروەسا رۆن کریە، “رێدانا ب ئوکراینایێ ژ بۆ بکارئانینا مۆشەکێن دوورمەودا، کو وەکی سیستەما مۆشەکی یا تاکتیکا ئارتێشا ئامەریکایێ یان ژی ATACMS تێ ناسکرن، د چارچۆڤەیا بەرسڤا ژ نشکێ ڤەیا رووسیایێ بوو ژ بۆ ئانینا ھێزێن کۆرەیا باکور بۆ ناڤ وی شەری دە بوو.”
