ھەژمارا کوشتیێن ئێریشا ئیسرایلێ یا ل سەر تەدموورا سووریەیێ گەھشت 68 کەسان، ھەروەسا زێدەتری 20 ئیراقیان د ناڤ کوشتیان دە نە و پرانیا وان ژی د ناڤ رێزێن تەڤگەرا نووجەبایێ دە بوون.
رەوانگەھا سووریەیی یا مافێن مرۆڤان ئیرۆ (پێنجشەمبێ، 21/11/2024) راگەھاند، “ھەژمارا کوشتیێن ئێریشا ئسرایلێ یا ل سەر تەدموورێ گەھشت 68 کەسان”. ئاماژە ژی دا، “ھەژمارا کوشتی و برینداران گەھشت 111 کەسان.”
رەوانگەھا سووریەیی رۆن ژی کر، “یەک ژ ئارمانجێن وێ ئێریشێ جڤینەکە کۆمێن چەکدارێن نێزی ئیرانێ ل باژارێ تەدموورێ بوو، کو سەرکردەیێن نووجەبایێ و حزبولاھا لبنانی تێ دە بوون.”
ھەر وێ چاڤکانیێ تەکەز ژی کر، “ھەژمارا کوشتیێن سووریەیی 42 کەسن، کو پێنج ژ وان ئەفسەرن و ئالیکارێن حزبولاھێ نە، ھەروەسا ناسنامەیێن 22 ژ وان ژی سووریەیی نەبوونە، پرانیا وان ژ تەڤگەرا نووجەبایێ یا ئیراقی بوون و 4 کەس ژی ژ حزبولاھا لبنانی بوون.”
ھەروەسا ئەشکەرە بوویە کو ئیسرایلێ ئێریش کریە سەر دو جھان، یەک ژ وان عەمبارەکە چەکی بوو ل نێزی دەڤەرا پیشەسازی، کو مالباتێن چەکدارێن ئیراقی و بیانی لێ بوون.
