چاڤکانیەکی ئاگاھدار ئیرۆ 3/12/2024 راگەھاند ل سەر داخواز و پشتەڤانیا ھێزێن ھەڤپەیمانیا ناڤنەتەوی، ھێزێن سووریەیا دەمۆکراتیک (هەسەد)ێ ئیرۆ ئێریش و ئۆپەراسیۆنەک ل سەر 7 گوندێن بن دەستھلاتیا ئالیگرێن رەژیما سووریێ و ئیرانێ یێن ل رۆژھلاتێ فراتێ پێکانیە.
ھەمان چاڤکانیا نێزیک ھەسەدێ راگەھاند: “ب فەرمانا ھێزێن ھەڤپەیمانا ناڤنەتەوی، ھەسەدێ ب بەشداریا چەکدارێن عەشیرەتێن ئالیگرێ ئەنجوومەنا لەشکەری یا دێرەزۆرێ، ب ئارمانجا کۆنترۆلکرن و دەرخستنا چەکداران ل وان ناڤچەیان، ئێریش کرنە سەر 7 گوندان، کو ئالیگرێن رەژیما ئەسەد و ئیرانێ ل وان دەڤەران دەستھلاتداربوون و ژ وان دەڤەران ڤە ئێریش دکرن سەر ھێزێن ھەڤپەیمانیا ناڤنەتەوی.”
ھەروەھا گۆت: “ھەسەدێ کاری ب پشتەڤانیا ھێزێن ھەڤپەیمانیا ناڤنەتەوی و چەکدارێن عەشیرەتان ڤە گوندێن حوسێنیە کۆنترۆل بکن و پەڤچوونێن ل ناڤچەیێ ژی بەردەوامن.”
ل گۆر ھەمان چاڤکانیێ “ھێزێن رووسیایێ چەند رۆژەکان بەری نھا ب ھەماھەنگیا ل گەل ھێزێن ھەڤپەیمانیا ناڤنەتەوی ڤە ئەو 7 گوند بجیھ ھشتن.”
ھەروھا دیار کر: “بالەفرێن ھەڤپەیمانیا ناڤنەتەوی بەشداری ل ئێریشا ل سەر 7 گوندان دە کرن، کو ھەژمارەک جیھێن گرووپێن ئالیگرێن سووریێ و ئیرانێ بۆمبەباران کرن.”
د ڤێ دەربارێ دە ئەنجوومەنا لەشکەری یا دێرەزۆرێ ب داخویانیەکی راگەھاند: “ل رۆژئاڤایێ سوریێ د دەمێن داوی دە گەلەک بوویەر دقەومن و ھەتا ھەرێمێن چۆلستانی باندۆرەک وان یا جددی ھەیە. لەوما ژ بەر ڤان بوویەران، مەترسی ھەیە کو ب تایبەتی ل باکوور و رۆژھلاتێ دێرازۆرێ ل دەڤەرێن کو ڤالاتیا ئەولەکاریێ لێ ھەیە، شانەیێن داعشێ بکەڤن ناڤا لڤ و تەڤگەرێ.”
ل گۆر ھەمان داخویانیێ: “ژ بەر ڤێ مەترسیا جدی ئەم ئاگاھداریێ دکن کو ھێزێن مە ل گوندێن سالحیە، تابیە، ھاتلا، ھاشام، مارات، مەزلوم و حوسەینیەیێن ل رۆژھلاتێ دێرازۆرێ بەرپرسیاریا گەلێن ھەرێمێ گرتیە سەر خوە.”
ئەنجوومەنا لەشکەری یا دێرەزۆرێ دیار کر: “ھێزێن مە ل سەر بانگا گەلێ ھەرێمێ یا ل ھەمبەری مەترسیا کو چەتەیێن داعشێ گەشەدانێن ل رۆژئاڤایێ وەلات ژ خوە رە بکە ھنجەت و تەڤلیھەڤیان دەرخینە، ل ڤان گوندان ھاتنە بجیھکرن.”
ژ ئالیێ دن ڤە چاڤکانیێن ناڤخوە ژی دبێژن: بەشەک ژ روونشتڤانێن ناڤچەیێ د ئەنجاما تۆپبارانا ھێزێن ل ھەرێمێ و پەڤچوونێن بەردەوام دە کۆچبەری ناڤچەیێن دن دبن.
ھەروەھا تێ گۆتن، “بالەفرێن ھێزێن ھەڤپەیمانیا ناڤنەتەوی جیھێن ملیسێن ئیرانێ یێن ل باژارۆکێ خەشاما باکورێ رۆژھلاتێ دێرەزۆرێ کرنە ئارمانجا ئێریشێ.”
