ل گۆر نووچەیا وەلات تیڤێ ئیسرایل ل جھەکی نھێنی ل باکور روونشتنەک لدارخست و ئارتێشا وی وەلاتی ئاڤاکرنا یەکینەیەکا تایبەت یا دەستوەردانا بلەز ل بلنداھیێن جۆلان راگھاند.
جەنەرال یار بلای، کو چاڤدێریا یەکینەیا نوویا ب ناڤێ “بەڕی” دکە، ئەو یەکینە وەک ھێزەکا ئاکتیڤ یا ژناڤبەرە کو دکارە د ناڤا چەند چرکەیان دە تەڤبگەرە، و رێگریێ ل ھەر ئێریشەکا مینا یا 7ێ جۆتمەھا (2023) بکە. بلای تەکەز کر ژی کو، دێ ئەو یەکینەیا نوو ھەر وەختەکی و د ھەموو دەمان دە ئامادەبە.
وی بەرپرسێ ئیسرایلی گۆت ژی کو: “ئەگەر بوویەرەک ئەولەھیێ چێببە، دێ (یەکینەیا بەڕی) بێ رەحم ئێریشی دژمن بکە. ب ئاوایەکی کو ئەگەرا تێکچوونا وێ تونە بە؛ ژ بەر کو ئەو ب ھشیاریا بەردەوام ڤە گرێدایییە.”
ئەڤ یەکینە ژ شەرڤانێن کو ژ یەکینەیێن ئەلیت و ھەری باش یێن ئارتێش و ئیستخباراتا لەشکەری یا ئیسرایلێ ھاتنە ھلبژارتن، پێک تێ. و ژ بۆ کارێن کو ژ وان رە ھاتنە دەستنیشانکرن ھاتنە پەروەردەکرن.
چاڤکانیێن لەشکەری دیار کرن کو خەباتێن ئاڤاکرنا ڤێ یەکینەیێ بەریا 3 مەھان د چارچۆڤەیا دەرسگرتنا ژ بوویەرێن 7 جۆتمەھێ دە دەست پێ کرنە. ئارمانج د دەستپێکێ دە رووبرووبوونا چەکدارێن گرێدایی ئیرانێ بوو، چ سووری، یەمەنی، ئیراقی، یان یێن دن، کو دبە کو ژ جۆلانێ ل دژی وارگەھێن جھوویان ل ور تەڤبگەرن.
ل گۆر کو چاڤکانیەک لەشکەری یا ئیسرایلی ژ ئاژانسێن نووچەیان رە دیار کریە. “گەشەدانێن داوی ل سووریێ و ئەگەرا کۆنترۆلکرنا رێخستنا دەستەیا تەحریر ئەل-شام ژ ھندەک باژارێن مەزن ل سووریێ، پێویستیا دامەزراندنا ڤێ هێزێ ب لەزتر دکە.”
