ژ بۆ رۆژئاڤایێ کوردستانێ
ئیرۆ وەکی کو گەلەک جاران د قۆناخێن جودا جودایێن دیرۆکێ دا ھاتییە دوبارەکرن، وەلاتێ مە دیسا بوویە مەیدانا شەر و پەڤچوونێن ھێزێن ستەمکار و بەشەک ژ ملەتێ مە تێ کۆچبەرکرن و دەربدەرکرن. ل رۆژاڤایێ کوردستانێ ملەتێ مە دیسا ھاتییە نەچارکرن کو ب سەرێ رێ و دربان بکەڤە و ئەڤ یەک ب خوە را زییانەکا مەزنا جانی و مادی و مەنەوی تینە، برینەکا دنا دژوار ژی د لاش و گییانێ ملەتێ مە دا ڤەدکە.
دڤێت باش وەرە زانین کو ھەتا مافێ دییارکرنا چارەنووسا نەتەوەیی یا ملەتێ کورد ل سەر وەلاتێ وان یێ کەڤنار ژ ئالییێ ھەموو ھێزێن سەروەرێن رۆژھلاتا ناڤین ڤە نەیێ ناسکرن دێ ئەڤ کریزا ل کوردستانێ و رۆژھلاتا ناڤین ب تو ئاوایی چارەسەر نەبە. د تو قۆناخەکا دیرۆکی دا تو ھێزەکا داگیرکەر ل کوردستانێ نەکارییە سەروەرییا خوەیا متلەق ئاڤا بکە. ب درێژاھییا دیرۆکێ گاڤا بەشەکا مەزنا وەلاتێ مە ھاتبە داگیرکرن ژی محەقەق ھنەک کورد رابوونە ل ھنەک دەڤەران راپەرینا خوە راگھاندنە. یانی ب تو ئاوایی د ناڤا رووپەلێن دیرۆکێ دا تەسلیمییەتا متلەقا ڤی ملەتی نەھاتییە تۆمارکرن و ئیرۆ ژی نایێ تۆمارکرن و دێ ژ نھا پێ دا ژی ب تو ئاوایی نەیێ تۆمارکرن ب حەزکرنا خوەدایێ کوردستانێ. ئەڤ یەک حەقیقەتا دیرۆکی-جڤاکی یا ڤی ملەتییە کو خوە بەردایە ناڤا کووراھییێن دل و گییانێ ملەتێ کورد، ئەڤ گییان تەسلیم نابە، خوەدایێ کوردستانێ ئەڤ ملەت ب ڤی ئاوایی ئافراندییە. میر و دیرۆکناسێ مەیێ مەزن شەرەفخانێ بەدلیسی 427 سالان بەرێ د شەرەفنامەیێ دا ئەڤ حەقیقەت وھا راگھاندییە: “کێ وەلاتێ کوردان داگیر کربە، د داوییا داوییێ دا پۆشمان بوویە و دیسا رادەستی وان کرییە.” یانی ئەم بەحسا ڤەھۆنانەکا چیرۆکی ناکن، بەحسا حەقیقەتەکا دیرۆکی دکن!
ژ بەر ھندێ دڤێت ھەموو ھێزێن ل سەر ئاخا کوردستانێ باش بزانن کو پلانسازییەکا وان یا ل دەرڤەیی ڤێ حەقیقەتێ دێ تەنێ تەمەنێ کریزێ درێژ بکە، چونکی ئەڤ گییانێ ملی دێ ب تو ئاوایی تەسلیم نەبە. ھەولدانێن وان یێن ژ بۆ بێستاتووھێشتنا ملەتێ کورد و گوھەراندنا دەمۆگرافییێ و حەسابێن وان یێن جودا جودا دێ ب تو ئاوایی کریزێ ئاش نەکە. ئێدی ب تو ئاوایی نکارن مە ب کراسەکی دینی و چیرۆکێن دەمۆکراتیک ژی بخاپینن؛ ئێدی ئیسلاما کوردستانی و دەمۆکراسییا کوردستانی ھەیە ل دژی ئیسلاما داگیرکەر و دەمۆکراسییا داگیرکەر! یانی ھوون ئێدی ژ ناڤا سەرێ خوە ھەتا بنێ پێ خوە تازی و رووتن، کراسەکی کو ھوون سەختەکارییا خوە پێ بنخومینن نەمایە.
ئەم ب ڤی ئاوایی ھەڤخەمییا خوە یا د گەل ملەتێ خوەیێ رۆژئاڤایێ کوردستانێ و ھەر وسا ھەلوەستا خوەیا ل دژی ھێزێن ستەمکار رادگھینن. داخوازا مە ژ خوەدایێ کوردستانێ ئەوە کو مە ھەر تم ھشیار بھێلە د دۆزا نەتەوەیی دا و ئارتێشێن خوەیێن ڤەشارتی بشینە ئالیکارییا ڤی ملەتێ بندەست.
پلاتفۆرما جوانێن سەربخوە
