چەکدارێن هەیئەت ته‌حریر ئەل-شامێ و هەڤالبەندێن وێ کەتن باژارێ حه‌مایێ و ئارتێشا سووریەیێ ژی ژ ناڤا باژێر ڤەدکشە.
رەوانگەها سووری بۆ مافێن مرۆڤان بەلاڤ کر، چەکدارێن هەیئەت ته‌حریر ئەل-شامێ و هەڤالبەندێن وێ ئیرۆ 5ێ بەرچلە، پشتی شەر و پەڤچوونێن گران ب هێزێن رێژیما سووریەیێ رە، کارین ژ گەلەک ئالیان ڤە بکەڤن ناڤا باژارێ حه‌مایێ.
ژ ئالیەکی دن ڤە، ئارتێشا سووریەیێ ئیرۆ د داخویانیەکێ دە راگهاند، «هێزێن مەیێن چەکدار شەر و پەڤچوونێن گران ژ بۆ شکاندن و تێکبرنا ئێریشێن توند و ل دوو هەڤێن رێخستنێن تەرۆریستی ل سەر باژارێ حه‌مایێ کرن.
ئارتێشا سووریەیێ گۆت ژی، د چەند دەمژمێرێن بۆری دە، ب دژواربوونا شەر و پەڤچوونێن ب کۆمێن تەرۆریست رە و زێدەبوونا هەژمارا کوشتیان د ناڤا رەفێن هێزێن وان دە، ڤان کۆمان کارین دەرباسی گەلەک تاخێن باژێر ببن.
هەروها دیار کر، ژ بۆ پاراستنا ژیانا سڤیلێن باژارێ حه‌مایێ و تەڤلینەکرنا وان د شەرێن د ناڤا باژاران دە، یەکینەیێن وان یێن لەشکەری یێن ژ ناڤا باژارێ دەرکەتن و ل دەرڤەیی باژار بجهـ بوون.
فەرمانداریا گشتی یا ئارتێش و هێزێن چەکدارێن سووریەیێ تەکەز دکە، ئەوێ بەردەوام بە ژ بۆ دەرخستنا وان دەڤەران ژ دەستێ رێخستنێن تەرۆرێ.
کۆنترۆلکرنا باژارێ حه‌مایێ پشتی وێ یەکێ تێ، چەکدارێن هەیئەت ته‌حریر ئەل-شامێ و هەڤالبەندێن وێ رۆژا 30ی مژدارا بۆری باژارێ حەلەبێ خستبوون بن کۆنترۆلا خوە، پشترە ژی بەرێ خوە دابوون حه‌مایێ و د چەند رۆژێن بۆری گەلەک گوند و باژارۆکێن باکورێ وێ پارێزگەهێ ژ دەستێ ئارتێشا سووریەیێ کۆنترۆل کربوون.
باژارێ حه‌مایێ ل ناڤەندا سووریەیێ ل سەر چەمێ ئاسییە و 213 ک.م ل باکورێ شامێ یە. حه‌ما ژ ئالیێ روونشتڤانان ڤە پشتی شام، حەلەب و حومسێ د رێزا چارەمین دەیە. د سالا 1982 دە، ئیخوان مسلمین ل حه‌مایێ دژی دەستهلاتا بەعس دەرکەتن، ئارتێشا سووریەیێ ژی کەت حه‌مایێ و زێدەتر ژ 30 هەزار روونشتڤانێن باژێر هاتن کوشتن.
