وەزارەتا پاراستنێ یا سووریەیێ راگهاند کو هێزێن ئارتێشا سووریەیێ ژ باژارێن دەرعا و سوەیدایێ ڤەکشیانە، كۆمێن چه‌كدارێن مخاله‌فه‌تێ ژی راگهاندن وان ناڤه‌ندا باژێر گرتیه.
پشتی کو هەیەتا ته‌حریر ئەل شامێ ئۆپەراسیۆنەکە بەرفرەهـ دا دەستپێکرن و حەلەب کۆنترۆل کر و حكوومه‌تا سووریەیێ ژ چەند باژارێن دن ژی ڤەکشیا بپێشڤەچوونا کۆمێن چەکدار بلەزتر بوویە.
هەیەتا ته‌حریر ئەل شامێ دیار کر ب مەرجێ ب ئاوایەکی ئەولە دەرکەڤن سەرکردەیێن حكوومه‌تا سووریێ تەڤاهیا ناڤچەیێن پارێزگەها ده‌رعایێ رادەستی وان کریە و ئارتێشا سووریەیێ ژ وێ پارێزگەهێ ڤەکشیایە.
ل پارێزگەها سوەیدایێ یا ل باشوورێ سووریەیێ، کۆمێن چەکدار دەست دانی سەر بارەگەهێن لەشکەری یێن ئارتێشا سووریەیێ.
کۆمێن گرێدایی هەیەتا ته‌حریر ئەل شامێ (هتش) 27ێ چریا پاشین ئێرشی ئیدلب و حەلەبێ کر.
کۆمێن چەکدار 27-28ێ چریا پاشین ژ رۆژئاڤایێ حەلەبێ بەر ب ناڤەندێ ڤە ب لەز ب پێش کەتن و وان 30ێ چریا پاشین ناڤەندا هەلەبێ ب دەست خست.
کۆمێن چەکدار 30ێ چریا پاشین ژی ناڤچەیا خان شێخوونێ کۆنترۆل کر و ب ڤێ یەکێ تەڤاهیا پارێزگەها ئیدلبێ کەت بن کۆنترۆلا وان.
ته‌حریر ئەل شامێ هەری داوی ژی دۆهـ (5ێ کانوونا پێشین) باژارێ حەمایێ کۆنترۆل کر.
هەیەتا ته‌حریر ئەل شامێ (هتش) راگهاند کو وان باژارێ تەلبیسەیێ یێ حومسێ ژی کۆنترۆل کریە.
ته‌حریر ئەل شامێ پشتی ڤان روودانان بەرێ خوە دا حومسێ و ل ناڤەندا باژێر ژی ئێرش و پەڤچوونان دەست پێ كر.
