گرووپێن چەکداران یێن سەر ب ترکیەیێ ژ دوھ ڤە ئێریشێن خوە ل سەر منبجێ گرانتر کرنە و ئەنجوومەنا لەشکەری یا منبجێ دبێژە: “ل سەر خەتا دێر حافر، رێیا تەبقا-حەلەبێ و ھەموو ئەنیێن منبجێ، ئارتێشا ترکیەیێ ب خوە پێشەنگیا ئێریشان دکە.”
ئەنجوومەنا لەشکەری یا منبجێ ئیرۆ 7 بەرچلە د داخویانیەکێ دە راگھاند، ئارتێشا ترکیەیێ و گرووپێن چەکدارێن سەر ب وێ ڤە د رۆژا دویەمین دە ئێریشێن خوەیێن ل سەر دەردۆرا منبجێ و گوندێن وێ زێدە کرنە. درۆنێن ترکیەیێ ب دەھان جاران ھەرێم بۆمبەباران کرن. کۆمێن چەتەیان ژی ب تۆپ و چەکێن گران ئێرشی گوندێن باشوور و رۆژئاڤایێ منبجێ کرن، دا کو د بەژاھیێ رە رێیا پێشڤەچوونێ ڤەکن.
د داخویانیێ دە ھات گۆتن، گرووپێن چەکداران ھەر وھا ئێریش برن سەر گوندێ ئۆن ئەل-داداتێ ل نێزی دەریێ ئەل-ساجوور. ھێزێن ئەنجوومەنا لەشکەری یا منبجێ بەرسڤ دان و شەر دەرکەت، د ئەنجام پەڤچوونان دە چەکداران خوە پاش ڤە کشاندن.
ئاماژە ب وێ ژی کر، ل سەر خەتا دێر حافر، رێیا تەبقا-حەلەبێ و ھەموو ئەنیێن منبجێ، ئارتێشا ترکیەیێ ب خوە پێشەنگیا ئێریشان دکە. ئەڤ ئەنیێن ھان ب رێیا درۆنان ھەری کێم 20 جاران بوونە ئارمانج.
ئەنجوومەنا لەشکەری یا منبجێ دیار کر، شەڤا بۆری و ھەتا ئیرۆ دانێ سبەھێ شەر و پەڤچوونێن دژوار چێبوون و ھەموو ئێرشێن چەکداران ھاتن تێکبرن.
گرووپێن چەکداران یێن د ناڤا ئارتێشا نشتمانی یا ئۆپۆزیسیۆنا سووریەیێ دە، دوھی 6 بەرچلە دەستپێکرنا شەرێ خوە ل دژی ھێزێن سووریا دەمۆکراتیک (ھەسەدێ) ل منبجێ راگھاندبوو.
