سەرۆکوەزیرێ سووریەیێ محەمەد غازی ئەل-جەلالی گۆت، ئەو ل مالا خوە دمینە و ئەو ئامادەیە کو پشتگریێ بدە دۆماندنا برێڤەبرنا کارووبارێن دەولەتێ.
جەلالی گرتە ڤیدیۆیەک ل ھەژمارا خوە یا تۆرا جڤاکی “فەیسبۆکێ” بەلاڤ کر و تێ دە گۆت: “ئەڤ وەلات دکارە ببە وەلاتەکی ئاسایی کو لگەل جیرانێن خوە و لگەل جیھانێ تێکلیێن باش چێبکە، لێ ئەڤ یەک گرێدایی گەلێ سووریەیێ یە کو کیژان سەرکردایەتیێ دخوازە. ئەم ئامادە نە کو لگەل ھەموو دەرفەتێن خوە لگەل وان ھەڤکاریێ بکن.”
سەرۆکوەزیرێ سووریەیێ گۆت ژی: “ئەم دێ لگەل ھەر سەرکردایەتیەکێ کو گەلێ سووریەیێ بخوازە ھەڤکاریێ بکن و ئەم دێ ھەموو دۆسیایێن حکوومەتێ رادەستی وێ بکن.”
جەلالی تەکەز کر ژی، “دڤێت ھەموو سازیێن دەولەتا سووریەیێ بێن پاراستن، ژ بەر کو ئەو ملکێن گشتی نە.”
ھەروھا گۆت: “ھێڤیدارم کو ھەر کەس ب عاقلانە تەڤ بگەرە. ئەم دەستێ خوە درێژی ئۆپۆزیسیۆنا کو دەستێ خوە درێژی کرنە ژی دکن و تەکەز کرن کو ئەو ئێریشی چ کەسێن ڤی وەلاتێ ناکن.”
ئەڤ یەک پشتی وێ تێ، ھێزێن چەکدارێن ئۆپۆزیسیۆنێ ئیرۆ 8 بەرچلە دەرباسی ناڤا شامێ بوون و ئارتێشا سووریەیێ و ھێزێن ئەولەکاریێ خوە ژ جھ و بارەگەھێن خوە ڤەکشاندن.
دەربارێ چارەنڤیسا بەشار ئەسەد دە ژی، رەوانگەھا سووری بۆ مافێن مرۆڤان بەلاڤ کر، ئەسەد ب رێیا فرۆکخانەیا ناڤدەولەتی یا شامێ ژ سووریەیێ دەرکەت، بەری کو ئارتێش و ھێزێن ئەولەھیێ ژ فرۆکخانەیێ ڤەکشن.
