ئیسرایل دیسا سنۆرێ سووریەیێ بنپێ دکە

ئیسرایل جارەکە دن ژ سنۆرێ سووریەیێ دەرباز دبە و بنگەھێن ئەولەھیێ یێن دیمەشقێ بۆمبەباران دکە.

ل گۆر ئاژانسا فرانس پرێسی و رەوانگەھا سووریەیی یا مافێن مرۆڤان، ئێڤارا دوھی (یەکشەمبێ، 8/12/2024) ژ بەر بۆمبەبارانکرنا سووریەیێ ژ ئالیێ ئیسرایلێ ڤە، ئاگر بەربوو بنگەھێن ئەولەھیێ یێن دیمەشقێ.

ھەروەسا ئارتێشا ئیسرایلێ قەدەغەیا ھاتن و چوونێ ل سەر شێنیێن پێنج باژارکان سەپاند، کو دکەڤن باشوورێ سووریەیێ. ئەو باژارک کو ل ئاستێ بلنداھیێن جۆلانێ نە ئەڤن؛ قونەیتەرە، ئوفانیە، ئەلحەمدیە، حەمدانیەیا رۆژئاڤا و قەحتانیە.

ئیسرایلێ ل سالا 1967 ئەو باژارک داگیر کربوون، لێ ل گۆر لھەڤکرنا سالا 1974 خوە ژێ ڤەکێشابوو. نھا جارەکە دن ئیسرایل زێدەتری 14 کیلۆمەتران چوویە ناڤ ئاخا سووریەیێ.

ئەڤ بریار پشتی دەمەکە کێم ژ گۆتنێن سەرۆکوەزیرێ ئیسرایلێ بنیامین نەتانیاھو یێن دوھی (یەکشەمبێ، 8/12/2024) ھات، کو راگەھاند لھەڤکرنا لگەل سووریەیێ یا سالا 1974 ل سەر جۆلانێ بداوی ھات، ژ بەر کو رژێما ئەسەد ھەرفی؛ وی فەرمان ل ئارتێشێ کر کو “دەستێ خوە دانە سەر وان دەڤەران.”