رۆژا ئینێ د جڤینا گشتی یا پارلامەنتۆیا ترکیێ دە بودجەیا سالا 2025ان یا وەزارەتا به‌رگریێ هات گۆتووبێژکرن.
وەزیرێ به‌رگریێ یێ تركیێ یه‌شار گولەر د گۆتارا خوە یا ل سەر بودجەیێ دە بەحسا پێشهاتێن داوی یێن ل سووریە و رۆژئاڤایێ کوردستانێ کر و گەف ل هێزێن سووریەیا دەمۆکراتیک (هه‌سه‌دێ) خوارن.
وەزیرێ به‌رگریێ یێ تركیێ یه‌شار گولەر د گۆتارا خوە دە ئانی زمان: «د ئەنجاما ئۆپاراسیۆنێن سەرکەفتی یێن ئارتێشا نشتمانی یا سووریێ یێن ل تل رفعەت، باشوورێ ئەلبابێ و خەتا منبجێ دە دانە دەستپێکرن رێخستنا تەرۆرێ نەچار مایە ژ ڤان دەڤەران ڤەکشە».
هه‌روها گۆت: «دخوازم جارەکە دن تەکەز بکم کو ئەم ب ت ئاوایی رێ نادن رێخستنا تەرۆری یا یه‌په‌گه-په‌كه‌كه ژ نەئارامیا ل قادێ سوودێ وەرگرە».
گۆتنێن وەزیرێ به‌رگریێ تركیێ یه‌شار گولەر بوون سەدەما نەرازیبوونان.
پارلامەنتەرا دەم پارتیێ مەرال دانش بەشتاش پشتی یه‌شار گولەر ئاخڤی و هەلوەستا هکوومەتا تركیێ یا ل دژی کوردێن رۆژئاڤایێ کوردستانێ رەخنە کر.
پارلامەنتەرا دەم پارتیێ مەرال دانش بەشتاشێ گۆت: «برێز وەزیر ڤێ یەکێ ژ بیر نەکن، یێن کو مافێن خوە یێن ژیانێ دپارێزن نە تەرۆریستن».
هه‌روها گۆت: «هوون نکارن گەلێن ل رۆژئاڤایێ وەکی تەرۆریست پێناسە بکن، د دەمەکێ دە کو وەزارەتا وە 25 هەزار ئەندامێن خوە ب تۆهمەتا تەرۆریستبوونێ دوور خستنە. هنەک ئەندامێن سازیا کو هوون نها ل سەرن بەری 8 سالان ئەڤ پارلامەنتۆ ب بالافرێن شەر بۆمبەباران کرن».
پارلامەنتەرا دەم پارتیێ ئاخافتنا خوه وها ب داوی كر: «له‌وما ئەز ژ بۆ وە پێشنیار دکم دەما هوون ئالیەکی ب تەرۆرێ تۆهمەتبار دکن چەند جاران بفکرن».
