مەزلووم عەبدی: داعشێ پلان ھەیە ئێریشی گرتیخانەیێن باکورێ رۆژھلاتێ سووریەیێ بکە

فەرماندارێ گشتی یێ ھێزێن سووریەیا دەمۆکراتیک (ھەسەدێ) دبێژە، “زانیاری ئاماژەیێ ددن ئامادەکاریێن داعشێ یێن ژ بۆ ئێریشکرنا ل سەر گرتیخانەیێن باکورێ رۆژھلاتێ سووریەیێ.”

فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی ئیرۆ (پێنجشەمبێ، 19/12/2024) د داخویانیەکێ دە ژ بۆ رۆژنامەیا “The Werold” یا بریتانیایی راگەھاند، زانیارێن ھەوالگری ھەنە کو داعشێ پلان دانایە ئێریشی وان دەزگەھێن باکورێ رۆژھلاتێ سووریەیێ بکە، یێن کو چەکدارێن وێ رێکخستنێ و مالباتێن وان تێ دە ھاتنە زیندانیکرن.

مەزلووم عەبدی ئاماژە ژی دا، ئێریشێن ترکیێ و کۆمێن چەکدار باندۆر ل سەر بەلاڤبوونا ھێزێن وان کریە، کو ئەڤ ژی باندۆرەکە نەرێنی دکە سەر ئەولەھی و پاراستنا وان دەزگەھان یێن کو چەکدارێن داعشێ و مالباتێن وان تێ دە ھاتنە گرتن.

ناڤبری ھێڤی ژی کر کو، بەرپرسێن ئامەریکایێ زێدەتر گڤاشتنێ بخن سەر ترکیەیێ و رێیێ نەدن کو ئێریشی کۆبانێ بکە، د ڤی واری دە ژی بگەھن ئاگربەستا ھەردەمی، کو “ئەڤ ژی ئەرکێ ئەخلاقی یێ ئامەریکایێ یە.”

فەرماندارێ گشتی یێ ھەسەدێ ل سەر پەیوەندیێن خوە لگەل دەستەیا تەحریر شامێ گۆت، پەیوەندی د ھەڤاھەنگیا ئەولەھیێ دە کورت بوونە، لێ تەڤی ڤێ یەکێ ژی داخویانیێن ئیدارەیا نوویا سووریەیێ ئەرێنی نە و ھەسەدە پێشوازیا وان دکە. ھەروەسا گۆت کو، ژ بەر مژوولبوونا وان ب پاراستنا باکورێ سووریەیێ ژ ئێریشێن ترکیەیێ ڤە، نەکاریە شاندەکێ بشینن دیمەشقێ.