سەرۆکوەزیرێ بەرێ یێ ترکیەیێ دبێژە، ئەگەر بریارا سیستەما فەدەرالی ل سووریەیێ وەرە دایین، دڤێت ترکیە نەترسە و وێ ژ بۆ خوە گەف نەبینە.
سەرۆکوەزیرێ بەرێ یێ ترکیەیێ و سەرۆکێ پارتیا سبەرۆژێ ئەحمەد داودئۆغلو دوھی 20 بەرچلە د ھەڤپەیڤینەکێ دە لگەل کەنالەکە ترکیەیێ ل سەر رەوشا سووریەیێ راگھاند، “ئەگەر نوونەرتیا ھەر کەسی مسۆگەر ببە، دەولەتەکە یەکگرتی پەیدا دبە.”
داودئۆغلو دەربارێ رەوشا رۆژئاڤایێ کوردستانێ دە گۆت: “دڤێت سووریەیی بریارا فەدەرالیبوونێ بدن، دخوازن یان ناخوازن. پشتی داگیرکرنا ئیراقێ، ئاڤاکرنا فەدەرالیەتێ نەچاری بوو. ژ مەلا موستەفا بارزانی ڤە شەر ھەبوو و کۆمکوژیا حەلەبجەیێ روودابوو. ل ترکیەیێ شەرێ کورد و ترکان نەبوو. چما نھا؟ ئەگەر سووری بریارا ھەرێمەکە خوەسەر بدن، دڤێت ترکیە ژێ نەترسە. ھێزێن مەزن نابە بترسن. دڤێت کورد ژی د ناڤا سیستەمێ دە جھ بگرن.”
داودئۆغلو ئاماژە ب وێ ژی کر، “تێگھشتنەک ھەیە کو ھەموو کورد یەپەگە نە. دڤێت کوردێن سووریەیێ ژی وەکە گەلێن دن وەکە جڤاکەکە خوەدی مافێن وەکھەڤ بێن راگھاندن. دڤێت ترکیە راگھینە کو ئەو ل دژی ھەر زولما ل سەر کوردێن سووریەیێ یە.”
ھەروھا داودئۆغلو راگھاند، د ناڤا ترکیەیێ دە ھندەک ئالی ھەنە، کوردان وەک گەفەکە سەرەکە دبینن و گۆت کو ئەڤ تێگھشتن وەرە ھلوەشاندن و گۆت: “ئەزێ چما ھەولێرێ ژ بۆ خوە گەف ببینم. دەما ھوون ھەموو ئالیان دژمن ببینن، ھوون مەزن نابن. دڤێت ترکیە بەریا ئامەریکایێ خوەدی ل مافێن کوردان دەرکەڤە.”
و سەرۆکێ پارتیا سبەرۆژێ گۆت ژی: “دڤێت دروزە ژی د ناڤا سیستەمێ دە جھ بگرن. دڤێت پێشی ل ئیستسمارکرنا دورزیان یا ژ ئالیێ ئیسرایلێ ڤە بێ گرتن. دڤێت ترکیە ت جاری دەستوورێ نەدە جوداکاریا عەلەوی-سوننی.”
