سەرۆک بارزانی تەکەز دکە، ئەو نە لگەل بکارئانینا پەیڤا “کێمنەتەوە”یە. ھەروھا تەکەز ژی کر، ھەر کەس ل ھەرێما کوردستانێ د ئارامی و ئەولەھیێ دەیە. دەربارێ رەوشا کورد ل سووریەیێ دە ژی گۆت: “دڤێت کورد ل سووریەیێ رێیا دیالۆگێ بگرن.”
سەرۆک مەسعوود بارزانی دوھ ئینێ 24 چلەیا 2025 د ھەڤپەیڤینەکێ دە لگەل تەلەڤزیۆنا “شەمس” دە راگەھاند، ئەو ل دژی بکارئانینا پەیڤا “کێمنەتەوە”یە. وی بەری چەند سالان سەردانا پارلامەنتۆیا کوردستانێ کر و ژ وان رە گۆت کو ل شوونا وێ پەیڤێ، پەیڤا “پێکھاتان” بکار بینن.
د دەربارێ پێشھاتێن نوویێن سووریەیێ دە ژی سەرۆک بارزانی گۆت، نیشانەیێن رووخانا رەژیما بەشار ئەسەد خویا بوون، لێ نەدھات چاڤەرێکرن کو ئەوقاس ب لەز و بەز بێ کرن. ھەروھا بال کشاند سەر وێ یەکێ، رێژیم دا د سالا 2011 دە تێک چت، لێ پشترە ئیران، رووسیا و حزبوللاھا لبنانی نەھشتن نەھیشتن ئەو بکەڤە.
تشتێ ژ دەستھلاتا نوویا سووریەیێ دبھیسن باشە، لێ دڤێت وەک خوە وەرە جیبجیکرن
بارزانی گۆت: “تشتێن کو مە ژ رایەدارێن نوویێن سووریەیێ بھیستنە گەلەک باشن، لێ ئەم ھێڤیدارن کو وەک خوە بێنە جیبجیکرن. دڤێت ئەم ھشیار بن، ژ بەر کو گۆتن تەنێ تێرێ ناکن، دڤێت پرسگرێک ب کرداری بێن چارەسەرکرن و دەرس ژ رابردوویێ وەربگرن.
سەرۆک بارزانی تەکەزی ل سەر وێ یەکێ کر کو ھێڤیا ھەری گرینگ ژ رێڤەبەریا نوویا شامێ ئەوە ئەو کو نەحەقیا ب دەھان سالان ل سەر کوردان تێ کرن ژ ھۆلێ رابکە، ژ بەر کو سالێن درێژە کورد ل وەلات ب تایبەتی ژ سالا 1962 ڤە راستی زەحمەتی، چەوساندن و ئازاران ھاتیە. ئەڤ رەوش نەھاتیە چارەسەرکرن و ددۆمە. وی ھەر وھا پێویست دیت کو حکوومەتا نوویا سووریەیێ زولما ل سەر کوردان و پێکھاتەیێن دن ھاتنە کرن و ئازادیا خوە وەربگرن. ھەروھا دڤێت کورد ل ڤی وەلاتی ژ بۆ چارەسەرکرنا پرس و مافێن خوە، رێیا ئاشتی و دیالۆگێ بگرن.
دڤێت کورد یەکرێز بچن شامێ
ھەروھا سەرۆک بارزانی تەکەز کر ژی، دڤێت کورد ل سووریەیێ سیستەما خوەیا سیاسی ھلبژێرن، لێ د دەستپێکێ دە دەنگێن خوە د ناڤا خوە دە بکن یەک و پشترە ب ھەڤ را بچن شامێ و داخوازێن خوە پێشکێش بکن و ب خوە بریارێ بدن. ل ھەمبەرێ ڤێ ژی دڤێت شام ل تایبەتمەندیا کوردان ل ناڤچەیێ تێبگھە.
من شیرەت ل مەزلووم عەبدی کر کو بێھێڤی نەبە
ل سەر ھەڤدیتنا ب فەرماندارێ گشتی یێ ھەسەدێ مەزلووم عەبدی رە ژی سەرۆک بارزانی گۆت: “رەوشا نەتەوەیی پێویستیا وێ ب جڤینەکە وھا ھەبوو و من ب گەرمی پێشوازیا عەبدی کر. ل ھەمبەرێ وی ژی بەحسا ھوورگلیێن ھەڤدیتنا خوەیا لگەل ئەحمەد شەرع کر، کو ھەم خالێن ھەڤبەش و ھەم ژی ناکۆک ژی د ناڤبەرا عەبدی و شەرع دە ھەبوون.”
سەرۆک بارزانی گۆت: “من شیرەت ل عەبدی کر کو قەت بێھێڤی نەبە، بەرێ خوە بدە دیالۆگێ، دەست ژ باندۆر و ھەژمۆنا دەرڤە بەردە و بەر ب یەککرنا گۆتارا کوردی ل سووریەیێ ڤە بچە.” تەکەز کر ژی، کورد ل سووریەیێ ھەر چەندی گەشبینن ژ پاشەرۆژا خوە، لێ ترس و ھەستیار ژی ھەنە، ب تایبەتی کو پێشەرۆژا سووریەیێ ب گشتی نە دیارە.
پەکەکە ل سووریەیێ پرسگرێکەکا مەزنە بھانەیەک ژ بۆ دەستێوەردانا ترکیەیێ یە
سەرۆک بارزانی گۆت کو، من قەت ھەست ب وێ یەکێ نەکریە کو مەیلا عەبدی یا جوداخواز ھەیە، لێ ژ وی رە دیار بوو کو کورد دخوازن ببن بەشەک ژ سووریەیێ و بگھن مافێن خوە.
دیار کر ژی، وی ژ عەبدی رە گۆتیە کو لگەل پەکەکێ ل ھەڤدو نەکەڤن، لێ دەم ھاتیە کو پەکەکە دەست ژ کوردێن سووریێ بەردە کو کوردێن سووریەیێ بریارێ ل سەر چارەنڤیسا خوە بدن و پەکەکە دەستێوەردانێ د کارووبارێن وان دە نەکە ژ دەڤەرێ دەرکەڤن.
ھەروھا سەرۆک بارزانی تەکەزی ل سەر وێ یەکێ کر کو ھەبوونا پەکەکێ ل سووریەیێ پرسگرێکەکا مەزنە و بەھانەیە بۆ دەستێوەردانا ترکیەیێ.
سەرۆک بارزانی گۆت ژی: “ھەرێما کوردستانێ شیانا وێ ھەیە کو رۆلەکی گرینگ د پرسا کورد ل سووریێ دە بلیزە، ب تایبەتی د یەکخستنا گۆتار و ھەلوەستا کوردی دە، ھاندان بۆ دیالۆگێ لگەل رایەدارێن نوویێن سووریەیێ و ئالیکاریا وان بۆ سوودوەرگرتنا ژ ئەزموونا ھەرێما کوردستانێ، لێ نە مەرجە ھەمان ئەزموونێ دوبارە بکن، ژ بەر کو ھەر پارچەیەک کوردستانێ خوەدی تایبەتمەندیێن خوەیە.” ھەروھا گۆت، ھەرێما کوردستانێ دکارە د وارێ ئابۆری دە ئالیکاریا وان بکە.
سەرۆک بارزانی ل سەر پرسا دەرباسبوونا پێشمەرگە بۆ سووریەیێ و پشتەڤانیا کوردان دە بال کشاند ل سەر وێ یەکێ، نە تەنێ کورد ل سووریەیێ، لێ ھەر کەسێ رووبروویێ مەترسی و زولمێ ببە، ئەو دودل نابن کو ئالیکاریا وان بکن و گۆت: “ل سووریەیێ ترسەک ل سەر کوردان ھەیە، لێ ئەم ھێڤیدارن کو ئەڤ ترس نەبە راستی و ئەم ھێڤی دکن کو د پراتیکێ دە نەبە.”
سیستەما فەدەرالیزمێ بۆ سووریەیێ دکارە ببە سیستەمەکە سەرکەفتی
د دەربارێ سیستەما فەدەرالی دە ژی سەرۆک بارزانی گۆت، پێناسەیا راستەقینەیا سیستەما فەدەرالی دابەشکرنا دادپەروەرانەیا ھێز و سەروەتە. ئەڤ سەرکەفتیترین سیستەمە ژ بۆ وان وەلاتێن کو جھێرەنگیا ئەتنیکی، ئۆلی، مەزھەبی ھەیە، ئەڤ یەک ژ بۆ سووریەیێ ژی دەرباس دبە، کو ھەمان روویێن فەدەرالیزمێ ھەیە و پێکھاتەیێن جھرەنگ تێ دە ھەنە.
