مالپەرا Aftonbladet یا سوێدی راگهاند کو سه‌لوان مۆمیکا هاتیە کوشتن، سه‌لوان مۆمیکا بەریا نها قورئانا پیرۆز شەوتاندبوو.
ل گۆری مەدیایا سوێدێ، سه‌لوان مۆمیکایێ کو ل سوێدێ ب شەوتاندنا قورئانێ هاتبوو ناسکرن، د وەشانا زندی یا مەدیایا جڤاکی دە ب گوللـەیان هاتیە کوشتن.
ل گۆری رۆژنامەیا Aftonbladet ، سه‌لوان مۆمیکا یێ 38 سالی دەما کو ب رێیا تیکتۆکێ وەشانا زندی دکر هاتیە کوشتن کو ئەڤ یەک ژ ئالیێ چاڤکانیێن رۆژنامەیێ ڤە هاتیە پشتراستکرن.
بەردەڤکێ پۆلیسێ ستۆکهۆلمێ دانەل ڤکدال ژی گۆت کو پۆلیسان ل هوندرێ ئاڤاهیێ و دەردۆرا وێ لێگەرین کریە.
هەر وها چاڤکانیان ئاماژە پێ کر کو سازیا ئەولەهیێ یا سوێدێ (SAPO) بەشداری دۆزێ بوویە لێ SAPO یێ رەد کر کو ل سەر هوورگلیێن مژارێ داخویانیێ بدە.
بەردەڤکێ SAPO یێ گابریێل وەرنستەدت گۆت، «ژ بەر کو مژار د بن لێپرسینا پۆلیسان دەیە ئەم نکارن ت داخویانیێ ل سەر ڤێ مژارێ بدن».
مۆمیکا ل سوێدێ ب شەوتاندنا قورئانێ بوو کەسایەتیەکە ناڤدار.
کریارێن وی د پێڤاژۆیا ئەندامەتیا ناتۆیێ دە سوێد خستبوو ناڤ کریزەکە دیپلۆماتیک و هەر وها ل سوێدێ ببوو سەدەما بلندکرنا ئاستا گەفا تەرۆرێ.
مۆمیکا د ڤێ چارچۆڤەیێ دە ژ بەر بوویەرێن شەوتاندنا قورئانێ یێن کو سالا 2023یان پێک ئانینە ب تاوانا “بەلاڤکرنا کینا نژادی” هاتبوو تاوانبارکرن و ئیرۆ ساعەت 11:00ان دێ بریار ل سەر دۆزا وی بهاتبا داین.
