وەزیرێ دەرڤەیێ ترکیەیێ ب سەرۆکوەزیر و وەزیرێ دەرڤەیێ قەتەرێ رە تەڤلی کۆنفەرانسەکە رۆژنامەڤانی یا هەڤپار بوو و پێ رە بەحسا رەوشا سووریەیێ یا نوو و کۆمێن چەکدار ل وی وەلاتی کر.
وەزیرێ دەرڤەیێ ترکیەیێ هاکان فیدان ئیرۆ (یەکشەم، 02.02.2025) د کۆنفەرانسەکە رۆژنامەڤانی یا هەڤپار دە ب سەرۆکوەزیر و وەزیرێ دەرڤەیێ قەتەرێ شێخ محەمەد بن عەبدرەحمان رە بەحسا قۆناغا نوو یا سووریەیێ کر.
وەزیرێ دەرڤەیێ ترکیەیێ راگەهاند، «دڤێ ئەولەهیا تەڤایا سووریەیێ بێ دابینکرن، هەروەسا دڤێ کۆمێن چەکدار تەڤلی ئارتێشا نشتیمانی یا سووریەیێ بێن کرن. ئەم چاڤدێریا پێنگاڤێن ئیدارەیا نوو یا سووریەیێ ل بەرانبەری یه‌په‌گێ و په‌كه‌كێ ژی دکن».
هاکان فیدان ئەشکەرە ژی کر، «نها دانووستاندنێن ئیدارەیا نوو یا سووریەیێ ب یه‌په‌گێ رە بەردەوامن، ئەم هێڤیدارن بێ خوینرێشتن ئەو ئارێشە بێ چارەکرن. ئەم وەکی ترکیە رێ نادن تەرۆر ل سووریەیێ بەردەوام ببە».
ناڤبری ئاماژە ژی دا، «من ب هەڤکووفێ خوەیێ قەتەری رە بەحسا وێ یەکێ کر کو، دڤێ چ ژ بۆ رەوشا لەزگینا سووریەیێ بێ کرن. هەروەسا گۆت، «دڤێ پرۆسەیا سیاسی ژ نها و پێ دە ب ئاوایەکی تەڤگر و دەمۆکراتیک بێ برێڤەبرن».
وەزیرێ دەرڤەیێ ترکیەیێ تەکەز ژی کر، «چارەیەکە ناڤدەولەتی ژ بۆ ئارێشەیێن هەلاویستییێن سووریەیێ د ڤێ قۆناغێ دە پێدڤییە، ئەم ب حکوومەتا سووریەیێ یا نوو رە د پەیوەندیەکە نێزیک دەنە». هەروەسا گۆت، «راگەهاندنا سەرۆکێ دەمکی پێشهاتەکە گرنگە».
