نووچەسازێ رۆژ نیوزێ کەمال ئامەد ل رانیایێ د ئەنجاما ئێریشەکێ دە ژیانا خوە ژ دەست دا
برێڤەبەرییا یەکیتیا راگھاندنا دەمۆکراتیک (YRD) یا گرێدایی پەکەکێ دەربارێ کوشتنا رۆژنامەڤان عەزیز کۆیلۆغلوو داخویانی دا و راگھاند کو (عەزیز کۆیلۆغلوو) ژ ئالیێ دەولەتا ترک ڤە ھاتیە کوشتن. ل گۆری داخویانیێ (عەزیز کۆیلۆغلوو) د 27ێ چلە دە ل نێزیکی رانیایێ د ئەنجاما ئێریشەکا دەولەتا ترک دە ژیانا خوە ژ دەست دایە.
د 27ێ چلە دە ل ناحیا حاجی ئاڤا یا رانیایێ د ئەنجاما ئێریشا دەولەتا ترک یا ل دژی ترومبێلەکێ دە 4 کەسان ژیانا خوە ژ دەست دابوون. دەر بارێ ڤان کەسان دە کو 2 ژ وان ژن و 2 ژی مێرن، ت داخویانیەکا فەرمی نەھاتیە دایین. سازیێن گرێدایی پەکەکێ ناڤێن ڤان کەسان پارچە پارچە پارڤە دکن. د داخویانیا کو ئیرۆ ھات دایین دە ھات راگھاندن کو یەک ژ ڤان کەسان (عەزیز کۆیلۆغلوو) ب ناڤێ کۆد کەمال ئامەدە کو ئەندامێ سازیا د بن ناڤێ کۆمیتەیا چاپەمەنیێ یا پەکەکێ دەیە.
مەجلسا مالباتێن شەھیدان یا باکور و رۆژھلاتێ سووریێ یا گرێدایی پەکەکێ بەریا نھا ب داخویانیەکێ راگھاندبوو کو ئەندامێ پەیەدێ ھۆگر دربێسیێ (دلاوەر عەرەبۆ) و ئەنداما رێڤەبەریا کۆنگرا ستار سالیحە ڤیان (ھێڤا عەرەبۆ) د ئەنجاما ئێریشا بالافرێن کەشفێ دە هاتنە کوشتن. لێ کۆمیتەیا شەھیدان یا پەکەکێ دەربارێ مژارێ ت داخویانی نەدا. ل گۆری زانیاریان، ناڤێن ڤان ھەر دو کەسان د کۆۆردیناسیۆنا سلێمانیێ یا پەکەکێ دە جھ دگرن.
ئیرۆ دەر بارێ (عەزیز کۆیلوۆغلوو) دە داخویانی ھات دایین. لێ دەر بارێ کەسێ چارەمین دە ھێ ژی چ داخویانی نەھاتنە دایین.
(عەزیز کۆیلوۆغلوو) کییە؟
عەزیز کۆیلوۆغلوو د سالا 1977 دە ل ناڤچەیا چنارا ئامەدێ ژ دایک بوو، د سالا 1993 دە تەڤلی ناڤا رەفێن پەکەکێ بوو و ژ بۆ خەباتێن باژێرڤانیێ بکە ھاتە شاندن بۆ ئامەدێ. د سالا 1998 دە ژ بەر کو ئەشکەرە بوو جارەکە دن ڤەگەریا چیا. کۆیلوۆغلوو د سالا 1999 دە ب بانگا ڤەکشینا عەبدوللاھ ئۆجالان چوو قەندیلێ و ل ور پەروەردەیا چاپەمەنیێ دیت.
کۆیلۆغلوو ھەتا سالا 2021 ل رۆژئاڤا ما، ژ بەر پرسگرێکێن لگەل کادرۆیێن پەکەکێ یێن ل رۆژئاڤا ژ کار ھات دوورخستن و ڤەگەریا کۆمیتەیا چاپەمەنیا پەکەکێ یا باشوورێ کوردستانێ. کۆیلۆگلوو کو ژ سالا 2022 ڤە ل سلێمانیێ دژیت، نووچەسازی بۆ رۆژنیوسێ دکر. د ھەمان دەمێ دە دبوو رێڤەبەرێ هەماهەنگییا ئانەفێ و رۆژ نیوزێ.
ھاتە دیارکرن کو عەزیز کۆیلۆغلوو دەما دچوو جڤینا کۆمیتەیا ھەرێمێ یا پەکەکێ ھاتیە کوشتن.
