وەکیلێ سەرۆکێ گشتییێ ئاک پارتیێ دبێژە، ئەو ژی چاڤەرێ دکن، عه‌بدوللا ئۆجالان بانگ ل په‌كه‌كێ بکە کو چەکێن خوە دەینە و ئەو د وارێ پابەندبوونا په‌كه‌كێ دە ژی گەشبینن.
وەکیلێ سەرۆکێ گشتییێ ئاک پارتیێ ئەفکان ئالا پشتی کۆنگرەیا مەزن یا پارتیا خوە ژ مەدیایا ترکیێ رە ئاخڤی و گۆت، ئەو دخوازن ئێدی ل ترکیەیێ توندی و تەرۆر نەمینە.
ئالا گۆت، ل دەردۆرا ترکیەیێ چ روو ددە، ئەو ب ئاوایەکی باش دبینن. هەتا نها گەلەک باج هاتیە دایین، وەلاتیێن ڤی وەلاتی هاتن کوشتن، گەلەک چاڤکانی ڤالا چوون و ل ناڤچەیێ ژی ئێشێن مەزن هاتن کشاندن.
ئالا، ل سەر پرسا پابەندبوونا په‌كه‌كێ ب بانگا ئۆجالان ژی گۆت، ئەو چاڤەرێ دکن ئۆجالان بانگ ل په‌كه‌كێ بکە چەکێن خوە دەینە. ئەو گەشبینن کو په‌كه‌كه پابەندی بانگا ئۆجالان ببە، لێ ل ناڤچەیێ گەلەک هێز و دەزگەهێن هەوالگێری و بەرژەوەندیێن جودا هەنە، ژ بەر ڤێ ئەو ب هشیاری نێزیکی ڤێ پرسێ دبن.
وەزیرێ دادێ یێ ترکیێ یلماز تونچ گۆت، دبە کو رێبەرێ گرتییێ په‌كه‌كێ عه‌بدوللا ئۆجالان بەریا داویا ڤێ مەهێ د ناڤا دو-سێ رۆژێن بێ دە، پەیامەکێ ژ رێڤەبەریا په‌كه‌كێ رە بشینە.
تونچ گۆت: «ئۆجالان دێ نە ب رێیا ڤیدیۆیێ پەیاما خوە بدە و ناڤەرۆکا پەیاما وی دێ نە ژ بۆ دەولەت و گەلێ ترکیەیێ بە، تەنێ ژ بۆ په‌كه‌كێ بە کو وی ئاڤا کریە».
وەزیرێ دادێ دیار کر، شاندا دەم پارتیێ دکارە ژ بۆ جارا سێیەمین سەردانا ئۆجالان بکە، لێ هەتا نها وان ت داخوازەک پێشکێش نەکرنە.
شاندەکە دەم پارتیێ کو وەک شاندا ئیمرالیێ تێ ناسکرن، ژ په‌رڤین بولدان و سڕی سورەییا ئۆندەر پێک تێ، هەتا نها 2 جاران ب عه‌بدوللا ئۆجالان رە ل سەر پێڤاژۆیا نوو یا ئاشتیێ ل ترکیە و باکورێ کوردستانێ هەڤدیتن پێک ئانینە.
