وەزیرێ کارێن دەرڤەیێ ئامەریکایێ ژ سەرۆکوەزیرێ ئیراقێ خوەست کو ئەو زوو دەست ب هنارتنا پەترۆلێ یا هەرێما کوردستانێ بکن و مەرجێن پەیمانێن شرکەتێن پەترۆلێ یێن ئامەریکایێ یێن ل هەرێما کوردستانێ کار دکن، بێنە بەرچاڤگرتن.
بەردەڤکا وەزارەتا کارێن دەرڤە یا ئامەریکایێ تامی بروس راگهاند کو وەزیرێ کارێن دەرڤەیێ ئامەریکایێ ماركۆ رۆبیۆ رۆژا سێشەمێ ب تەلەفۆنێ ب سەرۆکوەزیرێ ئیراقێ محەمەد شه‌یاع سوودانی رە ئاخڤی.
تامی بروس دا زانین کو د وێ پێوەندیا تەلەفۆنی دە ل سەر هەڤپەیمانیا ستراتەژیکا ئامەریکا-ئیراقێ، دەستپێکرنا ژنووڤە یا هنارتنا پەترۆلێ یا هەرێما کوردستانێ، کێمکرنا باندۆرا ملیسێن کو ل ئیراقێ ئیران پشتگریا وان دکە و رەوشا سووریەیێ ئاخڤین.
بەردەڤکا وەزارەتا کارێن دەرڤە یا ئامەریکایێ د داخویانیێ دە گۆت:
“وەزیرێ کارێن دەرڤەیێ ئامەریکایێ و سەرۆکوەزیرێ ئیراقێ ل سەر سەربەستیا ئیراقێ یا د وارێ ئەنەرژیێ دە و ژ نوو ڤە دەستپێکرنا هنارتنا پەترۆلێ [یا هەرێما کوردستانێ] ب لەز ب رێیا بۆریا ترکیە-ئیراقێ ل هەڤ کر”.
ماركۆ رۆبیۆ تەکەزی ل سەر وێ یەکێ کر کو دڤێ رێز ل مەرجێن پەیمانێن شرکەتێن پەترۆلێ یێن ئامەریکایێ یێن ل هەرێما کوردستانێ و ئیراقێ کار دکن، وەرە گرتن و گۆت کو ئەڤ یەک ژ بۆ هلبەرینا زێدەتر یێن ئامەریکایێ یا ل ئیراقێ گرینگە.
ل گۆری داخویانیا بەردەڤکا وەزارەتا کارێن دەرڤە، رۆبیۆ ب سەرۆکوەزیرێ ئیراقێ رە رەوشا سووریەیێ ژی نرخاندیە.
تام بروس هەر وها گۆت، “وەزیرێ کارێن دەرڤەیێ ئامەریکایێ گۆتیە کو دڤێ سووریە نەبە ستارگەها ئەولە ژ بۆ تەرۆرێ و ل جیرانێن خوە نەبە گەف”.
رۆبیۆ و سوودانی د هەمان دەمێ دە تەکەزی ل بریارداریا خوە یا بەردەوامکرنا دیالۆگێ یا ل سەر مژارێن هەرێمی و بپێشخستنا هەڤپەیمانیا ئەولەهیێ یا د ناڤبەرا ئیراق و ئامەریکایێ دە کر.
