داخویانیا سەرۆکێ په‌كه‌كێ عه‌بدوللا ئۆجالان، کو دەمەکێ درێژ بوو پرۆپاگاندایا وێ هاتیە کرن، دگەل رایا گشتی هات پارڤەکرن. داخویانیا ئۆجالان نەتشتەکێ پڕ سورپرایز بوو. به‌لكو به‌رده‌وامیا گۆتنێن وی یێن سەردەمێن وی یێن دەستپێکێ بوون دەما کو ئەو ڤه‌گه‌ریایه ترکیێ.
ئۆجالان جارەکێ ژی نەگۆتیە کوردستان
دەما کو ئەندامێن پارتیا دەمێ ل دەرڤە گۆڤەند دگرتن، ئەندامێن پارتیا دەمێ ل هوندر ل سەر پێیان بۆ داخویانیا ئۆجالان چەپک لێدخستن. ب ئحتیمالەکە مەزن ئەو ب خوە ژی نزانن کا وان ژ بۆ چ چەپک لێددان. ژ بەر کو پەیام ژ سەری هەتا داویێ داخویانیەک بوو کو کوردان قەبوول نەدکر.
ئۆجالان داخواز کربوو په‌كه‌كە، ئه‌وا بەریا 45 سالان ژ بۆ «کوردستانا یەکبوویی و سەربخوە» دەست ب خەباتێ کربوو، بێیی کو دەولەتەکا سەربخوە یا کوردی، خوەسەری، رێڤەبه‌ریا هەرێمی ئان ژی تشتەکێ وەکی وێ بخوازە، خوە فەسخ بکە.
ئۆجالان د داخویانیا خوە دە ژ بۆ کوردان تشتەک نەخوەست، هەتا د داخویانیێ دا پەیڤا کوردستان قەت دەرباس نەبوو و ناڤێ کورد ژی تەنێ دو جاران ب ئاوایێ پەیوەندیێن ترک -کورد ب هەڤ رە دەرباس بوو. ئۆجالان، کو په‌كه‌كە وی وەک «رێبەرێ گەلێ کورد» ددە ناسین، نکاریبوو ببێژە کوردستان، نکاریبوو ببێژە کورد. هەتا وی ژ بۆ کوردان ژی تشتەک نەخوەست. دەڤلەت باخچەلی، ناڤێ هەری نەتەوەپەرەست و ترکپەرەستێ دەولەتا ترک، دەما کو دئاخڤە ناڤێ «کورد» بێتر بکارتینە. بەلکی ئەگەر باخچەلی داخویانیا ئۆجالان بنڤیساندبا، دێ ژ بۆ کوردان بێتر تشت خوه‌ستبانه.
ئۆجالان: پشتی سالێن 1990ێ شەرێ په‌كه‌كێ نەپێویست بوو
د ئاخافتنا ئۆجالان ده چەند خالێن سەرەکە هەبوون:
1- ژیانا کوردان بێیی ترکان نە مومکینە، پێکڤەژیانا وان زه‌روریه.
2- مۆدەرنیتەیا کاپیتالیست دخوازە کورد و ترکان ژ هەڤ ڤەقەتینە، دڤێ ئەم ل دژی ڤێ دەرکەڤن.
3- دەولەت – نەتەوە یا جودا، فەدەراسیۆن، خوەسەریا ئیداری و چاندیخازی ژ بۆ کوردان نە چارەسەری یە.
4- بلا په‌كه‌كە چەکێن خوە دەینە، هەموو بەرپرسیاری سەر منە.
ئاخافتنا ئۆجالان د بنگەهێ خوە دە دکارە د ڤان چار خالێن سەرەکە دە بێ کورتکرن. لێ تشتەکی دن کو دڤێ ئەم ب بالداری بنخێز بکن ئەڤ گۆتنێن ئۆجالانن: «د سالێن 1990ی دە، هلوەشینا سۆسیالیزما-رەئەل ژ بەر سەدەمێن هوندرین و چارەسەرکرنا ئینکارا ناسنامەیان ل وه‌لات، پێشڤەچوونێن د ئازادیا ئیفادەیێ دە، بوونە سەدەم کو په‌كه‌كە بێ واتە بمینە و زێدە خوە دووبارە بکە».
یانی ل گۆری ئۆجالان، دەولەتا ترک د سالێن 1990ی دە ئازادیا خوە ئیفادەکرنێ دەست پێ کریە و پشتی وێ شەرێ په‌كه‌كێ بێ واتە بوویە. بفکرن کو پشتی سالا 1990ی، ژ بەر په‌كه‌كێ 5000 گوند هاتن ڤالاکرن، 17.000 هەزار کەس د کوشتنێن کووژەرێن وان نەدییار دە هاتن کوشتن، نێزیکی 50 هەزار کەس وەک گەریلا و سڤیل ژیانا خوە ژ دەست دان. یانی ئەڤ هەموو بێ واتەنە. ل هەمبەر ڤێ تەنێ تشتەک هەیە کو بێ گۆتن، ئەو ژی ئەڤە: «ئۆجالان تشتێ تفکری د ئالیسە».
تو ژ بۆ خوەبرێڤەبرنا کوردان هیچ تشتەکی ناخوازی، تو مافێ هەری هێسان ژی یێ زمانێ دایکێ ناخوازی، نەخوە تە چما 50 هەزار کەس دان کوشتنێ؟ تو دێ چاوا حسابا ڤێ بدی؟
دڤێ ئۆجالان و په‌كه‌كه بێن دارزاندن؟
ب فەرمانا په‌كه‌كێ، پارتیا دەمێ کورد کێشان کۆلانان ژ بۆ داخویانیا ئۆجالان. ل قامشلۆ، ل سلێمانیێ ژی ئەکران دانین. کۆمێن په‌كه‌كێ یێن کو په‌كه‌كێ ئەو برن بەر ئەکرانان ل هەر دەرێ گۆڤەند گرتن، سلۆگان ئاڤێتن، تلیلی کشاندن. کۆم جەژنەک کر وەک کو سەرکەفتنەک مەزن بدەستخستییە. لێ تشتێ کو هەیە، پێشکێشکرنا تەرمێ 50 هەزار کوردان و خەباتا وان ل سەر سێنیەکە زێرین ژ دەولەتا ترک رە بوو. تشتێ کو هەیە تەسلیمیەتە. دڤێ د ڤان 40 سالان دە چ ئانین سەرێ ڤی گەلی؟ ڤی گەلی زارۆکێن خوە دان، خوینا خوە دا، وارێ خوە دا، هێڤییێن خوە دا. لێ ئاپۆ-په‌كه‌كێ هیچ تشتەک نەدا ڤی گەلی.
پەیڤا «ئۆجالان رێبەرێ گەلێ کوردە»، بوو رێبەرێ تەسلیمکرنا کوردان
ب ئحتیمالەکە مەزن په‌كه‌كە و بکارهێنەرێن مەدیا جڤاکی د مژارێن کاموفلاژ و دەرەوان دە پسپۆرن. ئەو هەر تشتی دخەملینن. ئۆجالان هێژ د سالا 1999ان دە، د بالافرێ دە گۆت، «ئەز دخوازم خزمەتا دەولەتا ترک بکم»، لێ تەڤی ڤێ گۆتنێ په‌كه‌كە رابوو ئەو وەک «رێبەرێ گەلێ کورد» ئیلان کر.
نها ژی، د پەردەیا دویەمین یا خیانه‌تا ئۆجالان دە، دێ ڤێ یەکێ بکن. سەردەما 2 مین قووناغا خیانەتا ئاپۆ دێ زەلال و پاک بکن. دێ بەحسا زەکایا ئۆجالان یا عەجێب بێ کرن، دێ بێ گۆتن کو ئەو رێبەرێ ئاشتیێ یە. لێ د راستییێ دە ئەڤ گۆتن هەموو تەنێ پرۆپاگاندایەک و مانپولاسیۆنەکە. د راستیا دیرۆکێ دە، ئۆجالان ب رۆلا «رێبەرێ تەسلیمکرنا کوردان» تەڤگەریایە.
ئەڤ نە تشتەکێ نوویە. ئۆجالان 40 سالن وەک قاییومەک ل سەر کوردان هاتیە دەستنیشانکرن. دەولەت ژ ئۆجالان، کو 40 سالن ئەو خوەدی کریە و مەزن کریە، نها دخوازە کو ئەو دەینێ خوە بدن دەولەتێ. ئۆجالان ژی کوردێن باکور ل سەر سێنیەکە زێرین رادەستی دەولەتا ترک کرن.
تشتێن کو دەستپێک ژ بۆ ئۆجالان بێن گۆتن ئەڤن؛ گەلۆ په‌كه‌كە دێ گوهداریا ئۆجالان بکە یان نا، دڤێ گوهدار بکە یان نەکە، ئەمێ پاشێ بەرسڤا ڤان بدن.
