جیگرا سەرۆکا فراکسیۆنا دەم پارتیێ ل پارلامەنتۆیا ترکیێ، پێشوازی ل بریارا پەکەکێ یا ئاگربەستێ کر و داخواز ژ پارلامەنتۆیێ کر کو “گاڤێن بلەز باڤێژە و بەرپرساتیا خوە ل ھەمبەر وێ رەوشێ بگرە.”
کۆمیتەیا رێڤەبەرا پارتیا کارکەرێن کوردستانێ (پەکەکێ) ئیرۆ 1ێ ئادارێ ئاگربەست راگھاند و دیار کر کو ئەو دێ پابەندی ناڤەرۆکا بانگا ئۆجالان ببن.
جیگرا سەرۆکا فراکسیۆنا دەم پارتیێ گولستان کلچ کۆچیگت راگھاند: “پەیاما پەکەکێ یا ئیرۆ ژ بۆ بانگا ئۆجالان، گاڤەکا دیرۆکییە و وەکە پێنگاڤا یەکەم ئاگربەست راگھاند. ئەڤ ژی ب ئاوایەکی ڤەکری نیشان ددە کو ب لەز و بەز بانگا ئۆجالان پێک تینە.”
کۆچیگت گۆت ژی: “ھەر چەند ئەڤ بانگ د بنگەھێ خوە دە چەکدانین و ھلوەشاندنا پەکەکێ یە ژی، لێ بانگەوازیەک ژ بۆ دەمۆکراتیکبوونا دەولەتێیە، ژ بۆ دەولەت ژ دەمۆکراسیێ رە ھەستیار بە و سیستەمەکە دەمۆکراتیک بێ ئاڤاکرن کو ھەموو گەل، ھەموو باوەری و ھەموو جڤاکێن ل وەلات دژین، ل خوە بگرە.
جیگرا سەرۆکا فراکسیۆنا دەم پارتیێ گۆت ژی: “دەم ھاتیە کو پارلامەنتۆ د ڤێ پێڤاژۆیێ دە، رۆلا خوە یا ئەرێنی بلیزە و ژ بۆ پێکانینا پێڤاژۆیێ و پێکانینا ئاشتیێ گاڤێن پێویست باڤێژە.”
