سەرۆکێ مەھەپێ دبێژە: “پەیاما ئیمرالیێ ژ دەستپێکێ ھەتا داویێ ڤە، گەلەکی گرینگ و بنرخە و پەیاما قەندیلێ ژی ب ھەمان ئاوایی بنرخ و جھێ رازەمەندیێیە.”
سەرۆکێ گشتی یێ مەھەپێ دەولەت باخچەلی دوھ 1ێ ئادارێ ل سەر پەیاما عەبدوللاھ ئۆجالان و قەندیلێ ئاخڤی و ھەر دو پەیام ب گرینگ بناڤ کرن.
باخچەلی گۆت: “پەیاما کو ژ ئیمرالیێ ڤە ھاتیە، ژ سەری ھەتا داویێ ب نرخ و گرینگە و پەیاما کو ژ قەندیلێ ژی ھاتیە، بنرخ و جھێ رازەمەندیێیە.”
دەستنیشان کر، یەکبوونا ھەلوەستێن سەرکردەیێن پەکەکێ ل سەر بانگا ئۆجالان و پشتگریا وان ژ بۆ بانگێ د ڤێ قۆناغێ دە، د بەرژەوەندیا ھەر کەسی دەیە. گھیشتنا ئارمانجان ب رێیا تەرۆرێ، خەونەکە پێکنەھاتییە و گەلێ ترکیەیێ دیرۆکەکە نوو دنڤیسە.
سەرۆکێ مەھەپێ گۆت ژی: “سبەھا ترکیەیەکە ژ تەرۆرێ دوور دەست پێ کریە و رۆژا ئاشتیا نەتەوەیی ل بەر ھلاتنێیە.”
رێبەرێ پەکەکێ عەبدوللاھ ئۆجالان رۆژا 27 شوباتێ ب رێیا شاندەیا ئیمرالیێ یا دەم پارتیێ داخوازەک ل پەکەکێ کربوو و ژێ خواستبوو چەکێ خوە دەینە و خوە ھلوەشینە.
پشتی ڤێ بانگا ئۆجالان، کۆمیتەیا رێڤەبەرا پەکەکێ ئیرۆ 1ێ ئادارێ راگھاند، ژ بۆ داخوازا عەبدوللاھ ئۆجالان، ئەو ژ ئیرۆ پێ ڤە ئاگربەستێ رادگھینن. دەربارێ داخوازا ئۆجالان یا ھلوەشاندنا پەکەکێ ژی، پەکەکێ گۆت: “دڤێت ئۆجالان ب خوە کۆنگرەیا ھلوەشاندنێ برێڤە ببە.”
