سەرۆککۆمارێ ترکیەیێ راگھاند: “ئەگەر پێویست بکە، ئەم دێ ئۆپەراسیۆنێن خوە بدۆمینن”. ھەروھا گۆت: “ئەگەر پابەندبوون ب سۆزان نەبە، ئەم کەڤری ل سەر کەڤری ناھێلین.”
سەرۆککۆمارێ ترکیەیێ رەجەب تەییب ئەردۆگان دوھ 1ێ ئادارێ د بەرنامەیا فتارێ دە گۆت: “ئەگەر پەکەکە پێڤاژۆیا خوەیا بێچەکبوونێ راوەستینە یان ژی سۆزا خوە پێک نەینە، ئەم دێ دیسا دەست ب ئۆپەراسیۆنان بکن.”
ئەردۆگان ھەروھا گۆت: “ئەم خاپاندنێ قەبوول ناکن و ئەگەر پابەندبوون ب سۆزان نەبە، ئەم کەڤری ل سەر کەڤری ناھێلین.”
سەرۆککۆمارێ ترکیەیێ دا زانین ژی، “ژ بلی ھندەک کۆمێن ڤەدەر، پرانیا گەل سیاسەتا پەیاما ترکیەیا بێ تەرۆر، ب ئەرێنی پێشوازی کر و پشتگری دایێ.”
ئەردۆگان گۆت ژی: “ھەلبەت ئەم د چارەسەریا پرسگرێکان دا پێشانیێ ددن ئاخافتن و لھەڤکرنێ. ئەم دێ ژ نھا پێ ڤە ژی شوونا زمانێ نەفرەتێ و راگەشیێ دێ سیاسەتا دوئالی، خوەشبنی و دیالۆگێ دەرخینن پێش.”
رێبەرێ پەکەکێ عەبدوللاھ ئۆجالان رۆژا 27 شوباتێ ب رێیا شاندەیا ئیمرالیێ یا دەم پارتیێ بانگەک ل پەکەکێ کربوو و ژێ داخواز کربوو چەکێ خوە دەینە و خوە ھلوەشینە.
پشتی ڤێ بانگا ئۆجالان، کۆمیتەیا رێڤەبەرا پەکەکێ دوهی 1ێ ئادارێ راگھاند، ژ بۆ بانگا عەبدوللاھ ئۆجالان، ئەو ژ ئیرۆ پێ ڤە ئاگربەستێ رادگھینن. دەربارێ داخوازا ئۆجالان یا ھلوەشاندنا پارتیێ ژی، پەکەکێ گۆت: “دڤێت ئۆجالان ب خوە کۆنگرەیا ھلوەشاندنێ برێڤە ببە.”
