د سالێن داوی دە گەلێ کورد، ناڤێ گوندێ گوھەرزێ د ناڤا نووچەیێن تۆپباران و پەڤچوونان دە پر جاران دبھیزن. ب تایبەتی ژی ب کوشتنا 3 گەریلایێن ھەپەگێ ل گوھەرزێ د 21 شوباتێ دە، ناڤێ گوندێ گوھەرزێ د ھەر چار پارچەیێن کوردستانێ دە ب رێژەیەکە مەزن ھات بھیستن. ژ بەر کو مەدیایا پەکەکێ و مەدیایا ھندەک حیزبێن بچووک یێن باشوورێ کوردستانێ خەلکێ گوھەرزێ وەک خایین ئیلان کرن. لێ بەلێ دڤیابوو کو ئەگەر کورد ناڤێ گوھەرزێ ببھیزن، ب بەرخوەدانا وێ یا ل دژی رەژیما سەددام بھاتا بیرا وان. جھێ گوندێ وان ھات گوھەرتن، مرۆڤ نەچار مان کۆچ بکن. یان ژی دڤیابوو کو ناڤێ گوھەرزێ ب فیقێ، چاندنا برنجی، تری کزوانێن وێ و جوانییا سرووشتا وێ بھاتا بھیستن.
تشتێن کو گەلێ گوھەرزێ تێ رە دەرباس دبە، باکورێ کوردستانێ د سالێن 1990 دە ژیایە
نە خەلکێ گوھەرزێ ئەڤ نەحەقی حەقکرنە و نەژی ئەڤ شەرێ بێواتە ل ناڤ کۆلانێن گوندی دە حەقکرییە. دڤێت گەلێ گوھەرزێ ل گوندێ خوە، ل دیرۆکا خوە و ل پێشەرۆژا خوە خوەدی دەرکەڤە و ل دژی بکارئانینا وێ وەک قادا پەڤچوونان ببێژە “نا-نا”. بەلکی ئەم تەنێ بەحسا گوندێ گوھەرزێ دکن، لێ د راستیێ دە گوندێ بەلاڤە، گوندێ بەرچی، گوندێ سەرگەلێ، گوندێ مژێ دەست پێ بکە بەر ب گوندێن بەرواری ھەیانی گوندێن ل سەر خەتا رێکان-نیروە ل خوە خوەدی دەرکەڤن و ل دژی ڤێ شەرێ بێواتە یێ پەکەکێ و ئارتێشا ترکا دەرکەڤن.
ژ بەر کو ئەم گەلێ باکورێ کوردستانێ داویا ڤێ فیلمێ باش دزانین. ئەڤ پەڤچوونێن پەکەکێ و ئارتێشا ترک ب درووشمەیێن “بەرخوەدان، سەرکەفتن، شەر، ئەم دێ بقەدینن، ئەم دێ ب سەر بکەڤن” دەست پێ دکن و پاشێ ژی کەس کەسی ناقەدینە. گوند تێن شەوتاندن، خەراکرن، گەل د خەفکان دە تێ ئاسێکرن و تەنێ یێ کو تێک دچە گەلێ کوردە. ل باکورێ کوردستانێ 5000 گوند ب ڤی ئاوایی ب تەڤاھی ڤالا بوون. ملیۆنان مرۆڤ کو ل گوندێ خوە خوەدی ئەرد بوون، کۆچ کرن و وەک کارکەر کەتن دەستێ خەلکێ بییانی. چ واتەیا وێ نینە کو پەکەکەیا کو ل باکورێ کوردستانێ ھاتیە جەرباندن، تێک چوو و گەل د بشافتنی دە فەتساند، ھەمان پراکتیکێ ل کێستە، بەلاڤە، گوھەرزێ، سەرگەلێ و بەرێ گارە دوبارە بکە. دڤیابوو کو پەکەکێ ل ئەنقەرە و ستەنبۆلێ دەولەتا ترک تێک ببرا. دڤیابوو ل ئامەد، بۆتان و جۆلەمێرگێ دژمن راوەستاندبا. چ یەک ژ ڤان نەکر. لەشکەرێ ترک سینۆر دەرباس کر. ل سەر سینۆر نەسەکناند، ل مەتینایێ نەسەکناند، ل زاپێ نەسەکناند، لەشکەرێ ترک ب کووراھییا 60 کم کەت ھوندرێ ئاخا باشوورێ کوردستانێ و گەھەشتن ناڤا باخ و بۆستانێ گووھەرزێ. مەفرەزەکا لەشکەرێن ترک ژ چەلێ دەستێ خوە د ھەژینن و ل ناڤ نێروەیی و نھێلییان دگەرن ژ بەر کو پەکەکە ل وان دەڤەران نەمایە. تەنێ ل هنداڤی گوھەرزێ توونەلەک کو ژێ رە دبێژن گرێ بھار ھەیە. ئەو تونەلێ ژی ئەڤە سال و نیڤە دۆرپێچکرنە. گوھەرزێ بوویە قادا شەر. ھەکە ب ڤی ئاوایی بەردەوام بکە، سبە-دوسبە شەر دێ بگھیژە بەرێگارێ.
دڤێت گەل ژ پەکەکێ حەساب بپرسە؟
چما؟ ڤێ یەکێ چ مفا گھاندییە کوردان؟ بلا کەس خوە نەخاپینە، کریارێن کو پەکەکێ د گەریلا تیڤی دە ل ڤر و ل ور دبێژە وەک “من ل کورە ژارۆ دو لەشکەر کوشتن، من ئێریش بر سەر بارەگەھا ترکا یا ل دەڤەرا گوھەرزا کەڤن” قەت فەیدەیەکە بچووک ژی نا گەھینە کوردان. دڤێت کوردێ ھشیار و وەلاتپارێز رابن و قرکا پەکەکێ بگرن و لێ بپرسن، “تە 40 سالان نەھشت ئەم بچن زاپێ، گوندێ شیڤێ، وێلە،ئەلھ و ناڤ گوندێن رێکانییان. ئەو چاوا چێدبە وارێ کو ب سالان ژ بۆ مە قەدەغەنە وە د ناڤا چەند رۆژان دە رادەستی ئارتێشا ترک کر”
دڤێت کورد ژ پەکەکێ حەسابێ بپرسن. وەک میناک، “دڤێت گەلێ دێرالوکێ ژ پەکەکێ بپرسە، ل سەرێ کورەژارۆ لەشکەرێ ترک چ دگەرە؟ تە چما لەشکەرێ ترک ھەتا ڤر ئانی؟”
دڤێت گەلێ سەرگەلێ حەساب بپرسە و ببێژە “مە ھەموو جوورە پشتگری دا تە، تە چما سەرگەلێ رادەستی لەشکەرێ ترک کر؟”
پەکەکە بەرپرسیارێ داگیرکرنا ئاخا باشوورە ژ لایێ ترکییێ ڤە. کەسی دەستێ پەکەکێ نەگرتیە و نەگۆتیە کەڤرا نەهاڤێژە لەشکەرێ ترک. ب خوە پەکەکێ دەست ژ ئامەد، دێرسم و بۆتانێ بەردایە، دەست ژ ھەر دەرێ بەردایە. ھاتیە و ل خەتا دێرالۆک، شێلادزێ، ئامێدیێ ل گوھەرزێ، بەلاڤە، سەرگەلێ و بەرچی دبێژە ئەز دێ ترکان تێک ببم. دڤێت گەل ژ پەکەکێ حەساب بپرسە ژێ رە ببێژە کەکۆ تە سەرانسەری باکور تەسلیم کر و تە ھەموو دەڤەرێن سینۆری تەسلیم کرن، ئێدی ئەم ب ڤان دەروێن تە باوەر ناکن. و حەساپ ژێ بپرسە.
ئەگەر پێشمەرگە کەتبان ڤان دەڤەران، ئەڤ پرسگرێکە نەدھاتن ژیان کرن
و دڤێت ئەڤ گەل پستۆیێ پەکەکێ بگرە و حەساب بپرسە: تە چما قەبوول نەکر پێشمەرگە بکەڤن دەڤەرێ؟ ئەگەر د وان دەڤەران دە لەشکەرێ ترک ھەبە، ب سەربەست بگەرە، بەرپرسیارا ڤێ یەکێ پەکەکەیە. ئەگەر پەکەکە تەڤگەرەکە سیاسی یا ب نیەتا باش بوویا، دا دەڤەرێن کو نکاربە بپارێزە، رادەستی ھێزێن پێشمەرگە کت. لێ ئەڤ یەک نەکر. ئەڤ ژی تێ وێ واتەیێ کو نیەتا پەکەکێ خەرابە. نیەتا وێ نە تێکبرنا دەولەتا ترک یان ژی سەکناندنا وێیە.
ئەگەر پەکەکێ زنارێ کێستە، سۆرا سگێرێ، ئەلھۆ، سەرێ مامرەشا رادەستی ھێزێن پێشمەرگە کربان، ئیرۆ دا خەلکێ ل سەر رخەتا بەرواریا و ئامێدیێ رحەت بیت. ئەگەر پەکەکێ قەبوول بکرا کو ھێزێن پێشمەرگە بکەڤن ور ئەڤ تشتە یەک ژی نەدقەومین و خەلکێ دەڤەرێ دا ئازادانە ل بەرواری و دەڤەرا ئامێدییێ گەریێن. ھەکە ھشتبا پێشمەرگە بچوونا گۆھەرزا کەڤن، ئەڤ رەوش ل گوھەرزێ نەدھاتە ژیین. پەکەکە، گەلی و چیایێن کو 35 سالان قەبوول نەکریە کو پێشمەرگەیەک ژی بکەڤیتێ، رادەستی ئارتێشا ترک کر. جھێن کو ئیرۆ ئارتێشا ترک نەکاری بکەڤیتێ تەنێ جھێن د دەستێ پێشمەرگە دە نە.
ھەلوەستگرتنا ل دژی پەکەکێ وەلاتپارێزیا راستینە
بەری ھەر تشتی دڤێت ھەر کەس ل سەر ڤێ مژارێ زەلال بە. پشتگریدانا پەکەکێ نە وەلاتپارێزییە. بەرەڤاژی، ھەلوەستگرتنا ل دژی پەکەکێ وەلاتپارێزی و کوردایەتییە”. جوانێن پەکەکێ یێن ھێژ نەبالق کو تێن گوندێن وە دبە کو رەبەن و برچی بن. ھوون دکارن ژ بۆ وان خەمگین بن لێ سەدەما کو ئەو جوان د وێ رەوشێ دا نە، دیسا ژی پەکەکەیە. پەکەکە ژخوە نێزیکاتیا ھەستییاریا گەل ل ھەمبەر وان جوانان ئیستیسمار دکە. پەیڤەکا ب ناڤێ تونەل دەرخستنە، لێ راستی دا تونەلا کو ژێ دبێژن گۆرا جوانێن کوردە. موراد قارایلان فەرماندارێ ھەپەگێ دگۆت “تونەل دێ سەرکەفتنێ بینن”. لێ بەلێ جوان د وان گۆران دە حەسرەتی تیژکەکا رۆژێ نە و ژ برچیبوونێ دمرن. ئەوێن کو ئەو جوانە خستی وان تونەلان دا دزانین کو ئەو دێ ب ساخی ل ور بمرن. ئەو جوان برچی، دۆرپێچکری و ھێڤییا مرنێ نە خەما پەکەکێ نە.
ھەلوەستگرتنا گەلێ باشوورێ کوردستانێ ل دژی پەکەکێ، دێ پێشی ل ڤەگوھاستنا تێکچوونا پەکەکێ یا ل باکورێ کوردستانێ بۆ باشوورێ کوردستانێ بگرە و دێ ببە سەدەما پاراستنا ستاتوویا کو باشوورێ کوردستانێ ب تێکۆشینا 100 سالان، خوینا ب سەدان ھەزارا شەھیدان ب دەست خستیە.
ژییانا گوندیان چ قیمەت بۆ پەکەکێ نینە
پەکەکە دخوازە کو گوندیان ژ بۆ خوە بکە مەرتالێن زندی. ژ بۆ کو ھەبوونا خوە یا ل ور مەشرووع بکە، ھەول ددە ب باندۆرکرنا یەک یان دو کەسان د ناڤ گوندان دە وان بکشینە با خوە. ژ بۆ ڤێ یەکێ، ھندەک پرسگرێکێن جڤاکی، حەسوودی و ھتد… کوورتر دکە. ب ڤان کەسان بازرگانیێ دکە. ئەڤ کەس ژی ژ بۆ بەرژەوەندیێن خوە پێشەرۆژا گوند دخن مەترسیێ. چ یانی، نھا ژ بەر کو ل گوھەرزێ، ل گوندێن دێرالوکێ چەند کەس ژ پەکەکێ پەرە قەزەنج دکن، ما حەقە کو ئەڤ گوندە ببن قادا شەری؟ دڤێت ھەر کەس ھشێ خوە بینە سەرێ خوە. ھوون دکارن ئەندامێن پارتیێن سیاسی یێن جودا بن، دبە کو ھندەک ناکۆکیێن وە ھەبن. لێ یێکرێزی و ھەڤگرتنا گوند خەراب نەکن و تشتێن کو ژیانا گوندیان بێخن مەترسیێ مەشرووع نەکن. دڤێت گوند ب یەکیتی تەڤبگەرن و پێشەرۆژا زارۆکێن خوە، ئارامییا خوە و بەرژەوەندیا ھەڤپارا گوندی بپارێزن.
پەکەکێ ھەتا نھا چ تشت نەکریە کو پەڤچوونان ژ گوندان دوور بگرە. دڤێت ھەر کەس ڤێ یەکێ بزانبە: ژیانا گوندیان ژی نە خەما پەکەکێ یە. ھەتا پەکەکە ھەول ددە کو دژمن چەند تۆپا ل گوندی بدە و چەند گوندیان شەھید بخە دا کو پەکەکە ڤێ یەکێ ژ بۆ خوە بکە ئاموورەکی پرۆپاگاندایێ.
دڤێت گوندی ل ھەمبەری پەکەکێ ھەلوەستێ بگرن
دەستپێکێ گوھەرزێ، بەلاڤە، سەرگەلێ و ھەموو دەڤەرا نھێلی، بەرواری، ئامێدی، شێلادزێ و گەلێ دێرالوکێ، دڤێت ل شەرێ پەکەکێ یێ 45 سالی بنێرن و دەرسێ ژێ وەربگرن. دڤێت رێگری ل ڤەگوھاستنا تێکچوونا پەکەکێ یا ل باکورێ کوردستانێ بۆ باشوورێ کوردستانێ بێ گرتن. دڤێت گەل دەرکەڤە و ب ئەشکەرەیی ھەلوەستێ بگرە و ببێژە “ئەم ڤی شەری ل ناڤا گوندێ خوە ناخوازن”. گوند، ل شوونا کو ژ بەر رێبازێن شەری یێن تایبەت یێن پەکەکێ، فتنە فەسادییێن وێ و بوو چەند قورووشێن وێ تێک بچن و ببن دژمنێ ھەڤ و گوندی بخن مەترسیێ، دڤێت گوند ھەڤ ھەمبێز بکن و ب یەکیتی ببێژن “گوندێ مە نەکن قادا شەری” و دڤێت بخوازن کو ھێزێن پێشمەرگە وەرن دەڤەرێ. دەستپێکێ گوھەرز و گوندێن ل سەر خەتا شێلادزێ-ئامێدیێ و بەرواریێ، تەنێ ب ڤی ئاوایی دکارن ل کەسووکارێن خوە و گوندێن خوە خوەدی دەرکەڤن.
