وەزارەتا بەرگریێ یا ترکیەیێ کوشتنا 26 چەکدارێن پەکەکێ و یەپەگێ د دەما ھەفتیەکێ دە رادگەھینە. ھەروەسا تەکەزێ دکە کو، ل سەر ئۆپەراسیۆنێن خوە بەردەوام دبن.
بەرپرسێ راگەھاندن و پەیوەندیان یێ وەزارەتا بەرگریێیا ترکیەیێ زەکی ئاکتورک ئیرۆ (پێنجشەمبێ، 6/3/2025) د کۆنفەرانسا خوەیا رۆژنامەڤانی یا ھەفتیانە دە راگەھاند کو، د دەما ھەفتیەکێ دە 26 و ھەروەسا ژ مەھا یەکێ یا ئیسال ھەتا نھا ژی 478 چەکدارێن پەکەکێ ھاتنە کوشتن.
بەرپرسێ راگەھاندن و پەیوەندیانێ وەزارەتا بەرگریێ یا ترکیەیێ تەکەز ژی کر کو، ل سەر ئۆپەراسیۆنێن خوەیێن ل دژی چەکدارێن پەکەکێ و یەپەگێ بەردەوام دبن.
زەکی ئاکتورک ھەروەسا گۆت کو، د چارچۆڤەیا لێگەریانا ل دەڤەرێن ل ژێر ئۆپەراسیۆنێن پەنجە کلیدێ دە، وان دەستێ خوە دانایە سەر ھەژمارەکە زێدەیا چەک و تەقەمەنی و جەبلخانەیێن گرێدایی پەکەکێ.
شاندا ئیمرالیێ ل رۆژا پێنجشەمێ، 27/2/2025، پشتی جڤینا خوەیا لگەل رێبەرێ پارتیا کارکەرێن کوردستانێ (پەکەکێ) یێ زندانکری عەبدوللا ئۆجالان، د کۆنفەرانسەکا رۆژنامەڤانی دە پەیاما ئۆجەلان یا ب ھەر دو زمانێن کوردی و ترکی خواند.
سەرۆکێ شارەزاداریا مەزنا وانێ یێ ژکاردەرخستی ئەحمەد تورک پەیاما ئۆجالان خواند کو تێ دە ھاتیە، “پەکەکە د دەمەکێ دە ھاتبوو دامەزراندن کو رێیا دەمۆکراسیێ ھاتبوو گرتن.” ھەروەسا گۆتیە، “دڤێت زمانێ ئاشتی و دەمۆکراسیێ بێ پێشخستن.”
د بەشەکا دن یا پەیاما ئۆجالان دە ھاتیە، “دڤێت پەکەکە چەکێن خوە دانە و خوە ھلوەشینە و کۆنگرەیا خوە لدار بخە.”
ئۆجالان ھەروەسا د وێ پەیاما خوە دە ئەشکەرە ژی کر کو، بەرپرسیاریتیا ڤێ بریارێ ب ستوویێ خوە ڤە دگرە و گەرەنتیا دانووستاندنێن ئاشتیێ دکە.
