شێورمەندێ ئەولەھیا نشتیمانی یا ئامەریکایێ داخوازێ ژ ئیراقێ دکە کو ئارێشەیێن د رێیا ھناردەکرنا پەترۆلا ھەرێما کوردستانێ دە چارە بکە.
شێورمەندێ ئەولەھیا نشتیمانی یا ئامەریکایێ مایکل والتز ب رێیا تلەفۆنێ دانوستاندن لگەل سەرۆکوەزیرێ ئیراقێ محەمەد شیاع سوودانی کرن، و نیگەرانیا خوە ژی ژ بەر لەھیا ڤێ داویێ یا باژارێ بەغدایێ دیار کر.
والتز تەکەز ل سەر گرنگیا ئاڤێتنا پێنگاڤان بەر ب پەیوەندیەکا خورت ل سەر بنگەھا بەرژەوەندیێن ئەولەھی و بازرگانی یێن ھەڤپار کر. ئاماژە ژی دا کو بریارا نووکرنا دەستبەردانا ژ سزایێن ل سەر ھناردەکرنا کارەبا ئیرانێ ب ستراتەژیا “زێدەترین گڤاشتن” یا سەرۆک ترامپ ل سەر ئیرانێ ھەڤ دگرە، و گڤاشتن ل سەر ئیرانێ زێدەتر دبن ئەگەر ئیران ل سەر پێشخستنا شیانێن چەکێ ئەتۆمی و پشتەڤانیا تەرۆرێ ل سەرانسەری دەڤەرێ و بەردەوام بە.
ناڤبری پێشوازیا بزاڤێن سەرۆکوەزیرێ ئیراقێ ژ بۆ بدەستخستنا سەرخوەبوونا ئەنەرژیێ ژ بۆ ئیراقێ کر، ھەروەسا پشتەڤانیا حکوومەتا ئیراقێ کر کو پێشوازیا ل کۆمپانیێن ئەنەرژیێ یێن رۆژئاڤا و ئامەریکایێ ژ بۆ ناڤ کەرتێ پەترۆل و گازێ یێ ئیراقێ زێدەتر بکە.
شێورمەندێ ئەولەھیا نشتیمانی یا ئامەریکایێ ھەروەسا داخواز ژ حکوومەتا ئیراقێ کر کو، لگەل حکوومەتا ھەرێما کوردستانێ ژ بۆ چارەکرنا دوبەرەکیێن پەیمانا مایی و پێدانا پاشکەفتیێ قەرزدارێ کۆمپانیێن ئەنەرژیێ یێن ئامەریکایێ کار بکە، ھەروەسا داخواز کر کو حکوومەتا ئیراقێ رێکخستنکەرەکێ وەبەرھێنانێ ژ بۆ کارکرنا لگەل کۆمپانیێن ئامەریکایێ بھێلە، کو دخوازن ل ئیراقێ کار و وەبەرھێنانێ بکن.
مایکل والتز سپاسیا سوودانی کر، ژ بەر پابەندبوونا وی ب پەیوەندیێن دوئالی یێن ئامەریکا و ئیراقێ، ھەروەسا تەکەز ل سەر پابەندبوونا برێڤەبەریا ترامپ ژ بۆ خورتکرنا پەیوەندیێن ئەنەرژی و ئابۆری یێن ناڤبەرا ھەر دو وەلاتان ژی کر، ژ بۆ کو مفایی بگەھینە ھەر دو گەلێن ئامەریکا و ئیراقێ.
