ئەردۆگان ل سەر رێككه‌فتنا هه‌سه‌دێ و شامێ داخویانی دا

سەرۆککۆمارێ ترکیەیێ رەجەپ تاییپ ئەردۆگان ل سەر رێككه‌فتنا هه‌سه‌دێ و حکوومەتا سووریەیێ گۆت: «ئەم هەر هەولەکێ کو ژ بۆ پاقژکرنا سووریەیێ ژ تەرۆرێ تێ دایین، وەکی گاڤەکێ د رێیا راست دە دبینن».

هەر وها ئەردۆگان گۆت: «بێ کێماسی بجهکرنا لهەڤکرنا کو دۆهـ پێک هاتیێ دێ خزمەتا ئارامی و ئەولەهیا ترکیەیێ بکە، سەرکەفتیێن ڤێ یەکێ دێ هەموو برایێن مە یێن سووریەیی بن».

فەرماندارێ گشتییێ هێزێن سووریەیا دەمۆکراتیک (هسد) مەزلووم ئەبدی و سەرۆککۆمارێ دەمکی یێ سووریەیێ ئەحمەد شەرع شەڤا بۆری پەیمانەک ئیمزە کر و کارڤەدانێن وێ پەیمانێ بەردەوام دکن.

خالێن رێككه‌فتنا مه‌زلووم عه‌بدی و ئه‌حمه‌د شه‌رع:

1- گارانتیکرنا مافێن هەموو سووریان ژ بۆ نوونەراتی و بەشداریا وان د پرۆسەیا سیاسی و هەموو دەزگەهێن دەولەتێ دە، ل سەر بنگەها ژێهاتیبوونا وان، بێیی جوداهیا ئۆلی و نەتەوەیی.

2- جڤاکا کوردی، جڤاکەکە رەسەنە د دەولەتا سووریەیێ دە و دەولەتا سووریەیێ مافێ وێ یێ وەلاتیبوونێ و هەموو مافێن وێ یێن دەستووری گارانتی دکە.

3- ئاگربەست ل سەرانسەری هەرێمێن سووریەیێ.

4- هەموو سازیێن سڤیل و لەشکەری یێن باکورێ رۆژهلاتێ سووریەیێ تەڤلی رێڤەبەریا دەولەتا سووریەیێ تێن کرن، د ناڤ دە دەریێن سینۆر، فرۆکەخانە و کێلگەهێن پەترۆل و گازێ.

5- گارانتیکرنا ڤەگەرا هەموو کۆچبەرێن سووری بۆ باژارۆک و گوندێن خوە و مسۆگەرکرنا پاراستنا وان ژ ئالیێ دەولەتا سووریەیێ ڤە.

6- پشتگریا دەولەتا سووریەیێ د شەرێ وێ یێ ل دژی پاشماهیێن ئەسەد و هەموو مەترسیێن ل سەر ئەولەهی و یەکیتیا وێ.

7- رەدکرنا بانگێن پارچەبوونێ، ئاخافتنێن نەفرەتێ و هەولدانێن بەلاڤکرنا فتنەیێ د ناڤبەرا هەموو پێکهاتەیێن جڤاکا سووریەیێ دە.

8- کۆمیتەیێن جیبجیکار کار دکن و هەول ددن کو رێکەفتنێ جبجی دکن، ب ئاوایەکی کو داویا سالێ دەرباس نەکە.