شەڤا بۆری ب درۆنێ ئێریشی سەر بنگەھەکا ئارتێشا ترکیەیێ ل سنۆرێ کۆمەلگەھا باشیکێ ل دەشتا نەینەوایێ ھات کرن، لێ چ زرار ژ وێ ئێریشێ پەیدا نەبوونە.
دژەتەرۆرا کوردستانێ پارڤە کریە، “دەمژمێر 10:20 شەڤا بۆری ب دۆرەنەکا بۆمبەکری بنگەھا سەربازی یا زێلکانێ یا ئارتێشا ترکیەیێ ل کۆمەلگەھا باشیکێ ل پارێزگەھا نەینەوایێ ھاتیە ئارمانجکرن، لێ ل گۆر زانیاران چ زرارەکا جانی ژ وێ ئێریشێ پەیدا نەبوویە.”
ھەتا نھا چ کۆم و ئالیان بەرپرسیاریتیا خوە ژ وێ ئێریشێ رانەگەھاندیە و وەزارەتا بەرگریێ یا ترکیەیێ ژی چ رۆنکرنەک پارڤە نەکریە.
ئارتێشا ترکیەیێ ل سالا 2015 ب مەرەما مەشق و راھێنانان ژ بۆ ھێزێن حەشدا وەتەنی، کو ھێزەکا سونەیێن ئیراقێیە ژ بۆ بەرھنگاربوونا تەرۆرێ، بنگەھەکا سەربازی ل باکورێ چیایێ باشیکێ ل زێلکانێ ڤەکر و ھەتا نھا ژی ھێزێن وێ ھەر ل وێ بنگەھێ بنەجھن.
ھەتا نھا گەلەک جاران ب درۆن و مۆشەکان بنگەھا سەربازی یا ئارتێشا ترکیەیێ ل زێلکانێ ھاتیە ئارمانجکرن، جارا داویێ دەمژمێر 7:45 سبەھا رۆژا چارشەمبا 1/2/2023 بوو، کو ھەشت مۆشەک ئاراستەیی وی بنگەھی ھاتبوون کرن.
