کاروانەکە دن یا مالباتێن چەکدارێن داعشێ کو ژ 195 مالباتان پێک تێ، ژ کامپا هۆلێ یا رۆژئاڤایێ کوردستانێ بۆ ئیراقێ هاتن ڤه‌گه‌راندن.
وەزارەتا کۆچ و کۆچبەران یا ئیراقێ راگهاند، ئێڤارا دوهـ رۆژا چارشه‌می 12 ئادارا 2025ێ كاروانه‌كه دن یا مالباتێن چەکدارێن داعشێ ژ كامپا هۆلێ یا ل رۆژئاڤایێ كوردستانێ هاتن ڤه‌گه‌راندن و گهیشتن ئیراقێ.
زێدەتری 16 هەزار کەسوکارێن چەکدارێن داعشێ یێن ئیراقی ل کامپا هۆلێ مانە کو بێن ڤەگەراندن.
کۆنترۆلا کامپا هۆلێ نها د دەستێ هێزێن سووریەیا دەمۆکراتیک (هه‌سه‌دێ) دە یە.
وه‌زاره‌تێ ده‌ستنیشان كر، ئەڤ 23یەمین کاروانا مالباتێن داعشیانه کو تێن ڤەگەراندن و د ڤێ کاروانێ دە 593 کەس هەنە.
هەتا نها زێدەتری سێ هەزار مالباتێن چەکدارێن داعشێ یێن ئیراقی ژ کامپا هۆلێ هاتنە ڤەگەراندن و هەژمارا ئەندامێن وان نێزیکی 13 هەزار کەسانه.
ئەو کەسوکارێن داعشێ یێن تێن ڤەگەراندن دێ پێشی ل کامپا جەدایێ یا ل باژارێ مووسلێ بێن بجیهکرن و پشترە ژی ڤەگەرن جهێن خوە یێن بەرێ یێن ل پارێزگەهێن نه‌ینه‌وا، سه‌لاحه‌ددین و ئەنبارێ.
