شێورمەندێ ئەولەھیا نیشتیمانی و وەزارەتێن ئیراقێ داخواز ژ ئامەریکایێ دکن کو، ل بریارا خوە یا ل سەر راوەستاندنا پشتەڤانیێ ژ بۆ وان رێکخستنێن ناڤدەولەتی یێن ل ئیراقێ کار دکن ڤەگەرە.
جڤینەکا ب لەز ئیرۆ (پێنجشەمبێ، 13/3/2025) ب سەرۆکاتیا وەزیرێ دەرڤەیێ ئیراقێ فوئاد حسێن و شێورمەندێ ئەولەھیا نیشتیمانی یا ئیراقێ قاسم ئەعرەجی، وەزیرێن کۆچبەران، وەرزش و جوانان، کار و کارووبارێن جڤاکی، پەروەردە و نوونەرێ وەزارەتا ناڤخوە، سەرۆکێ دەزگەھێ ھەوالگری، سەرۆکێ دەستەیا ئەولەھیا نیشتیمانی، وەکیلێ وەزارەتا ئەولەھیا نیشتیمانی و ھەژمارەکا بەرپرسێن دن یێن حکوومەتێ ھات کرن.
د وێ جڤینێ دە بەحسا ناڤەرۆکا نامەیا نوونەرێ سکرتێرێ گشتی یێ نەتەوەیێن یەکگرتی ل ئیراقێ، ل سەر دەستنیشانکرنا ڤالاھیەکا کاری کو ژ ئەنجامێ برینا بودجەیێ ژ ئالیێ ئامەریکایێ ڤە سەر ھلددە و باندۆرێن وێ ل سەر بەرنامەیێن نەتەوەیێن یەکگرتی ل ئیراقێ، ھات کرن.
د راگەھاندنەکێ دە ھاتیە، “ھەژمارەکا بریارێن گرنگ ژ بۆ پشتەڤانیکرنا وەزارەتا کۆچ و کۆچبەران و دەزگەھێن ئیراقی ھات دان، کو ل سەر ڤێ مژارێ کار دکن.”
ھەروەسا د وێ جڤینێ دە تەکەز ل سەر بەرپرسیاریتیا جڤاکا ناڤدەولەتی ژ بۆ داخستنا پشکا دویێ یا دۆزا داعشێ ھات کرن، ب رێیا نووژەنکرنا وان مالباتێن کو تەڤلی وێ بوونە. تەکەز ژی کر، “ئەڤ بەرپرساتیەکا هەڤبەشە نە کو تەنێ یا ئیراقێ یە، لەوما ئەم داخوازێ ژ ئامەریکایێ دکن کو ل بریارا خوە یا ل سەر راوەستاندنا پشتەڤانیا خوە ژ بۆ رێکخستنێن ناڤدەولەتی ل ئیراقێ ڤەگەرە.”
ل رۆژا پێنجشەمبا بۆری ل بنگەھا نەتەوەیێن یەکگرتی ل ئیراقێ جڤینەک ب ئامادەبوونا شێورمەندێ ئەولەھیا نیشتیمانی یا ئیراقێ قاسم ئەعرەجی ھات کرن، ژ بۆ گەنگەشەکرنا رەنگڤەدانێن بریارا ئامەریکایێ ژ بۆ راوەستاندنا ئالیکاریان ژ بۆ رێکخستنێن مرۆڤی و باندۆرێن وێ ل سەر ناڤەندا ئەمەلێ یا چاکسازیا دەروونی و جڤاکێ.
د وێ جڤینێ دە دانوستاندن ل سەر رەنگڤەدانا بریارا راوەستاندنا ئالیکاریێن ئامەریکایێ ژ بۆ رێکخستنێن مرۆڤی و باندۆرێن وێ ل سەر وێ ناڤەندێ ھاتن کرن، ھەروەسا بەحسا نووژەنکرنا ناڤەندا جەدەیێ ژ بۆ پێشوازیکرنا وان مالباتێن کو ژ کەمپا ھۆلێ ڤەدگەرن ھات کرن.
