جه‌هه‌پێ جێگرێ ئیمامئۆغلوی بۆ شارەداریا ستەنبۆلێ دیار کر

ئەندامەکی جڤاتا شارەداریا ستەنبۆلێ ژ بۆ برێڤەبرنا پۆستێ سەرۆکێ شارەداریا وێ پارێزگەهێ ب وەکالەت هات دیارکرن.

ئاژانسا ئانادۆلویێ ئیرۆ (چارشەم، 26.03.2025) پارڤە کر، «دەنگدان ژ بۆ هلبژارتنا سەرۆکێ شارەداریا ستەنبۆلێ ل ئاڤاهیێ جڤاتا وێ پارێزگەهێ ب ئاوایەکی نهێنی هات کرن».

کاندیدێ جه‌هه‌پێ نووری ئاسلان، کو هەروەسا ئەندامێ جڤاتا شارەداریا ستەنبۆلێ یە، ب پرانیا دەنگێن ئەندامان وەکی سەرۆکێ شارەداریا ستەنبۆلێ هات هلبژارتن و وی پۆستی ب وەکالەت ب رێ ڤە دبە.

ل دوو ئاژانسا ئانادۆلویێ، د گەرا یەکێ یا دەنگدانا ژ بۆ هلبژارتنا سەرۆکێ شارەداریا ستەنبۆلێ دە، 301 دەنگ هاتن دان و پێنج دەنگ ژی نەهاتن هەژمارتن. کاندیدێ جه‌هه‌پێ ئاسلان 173 دەنگ و کاندیدێ ئاکه‌پێ ئۆکول ژی 123 دەنگ ب دەست خستن.

د گەرا دویێ یا وێ دەنگدانێ دە ژی، 302 دەنگ هاتن دان و ئاسلان 177 دەنگ و ئۆکول ژی 125 دەنگ ب دەست خستن.

ژ بۆ بدەستخستنا دەنگێن پرانیا رەها، گەرا سێیێ یا دەنگدانێ ژی هات کرن و تێ دە 302 دەنگ هاتن دان و کاندیدێ جه‌هه‌پێ ئاسلان 177 دەنگ و کاندیدێ ئاکپێ ئۆکول ژی 125 دەنگ ب دەست خستن. ب وێ ئەنجامێ ژی، کاندیدێ جه‌هه‌پێ ب وەکالەت بوو سەرۆکێ شارەداریا ستەنبۆلێ.

هێزەکە ئەولەهیێ یا ترکیەیێ ل رۆژا چارشەمێ (19.03.2025) چوو سەر مالا سەرۆکێ شارەداریا مەزنا ستەنبۆلێ ئەکرەم ئیمامئۆغلو و ئەو دەستەسەر کر.

دەستەسەرکرنا ئیمامئۆغلو رەنگڤەدانەکە مەزن پەیدا کر، وەلاتی ژ بۆ پشتگریکرنا ئیمامئۆغلو رژیان سەر جادەیان و خوەنیشاندانەکە بەرفرەهـ کر.

ئەکرەم ئیمامئۆغلو ل رۆژا پێنجشەمێ (20.03.2025) ل سەر تۆرا جڤاکی یا Xێ داخواز ژ وەلاتیێن ترکیەیێ کر کو، بێدەنگ نەبن و ل دژی وی شەرێ ل ترکیەیێ هەیە دەنگێ خوە بلند بکن. هەروەسا گۆت کو، پرسا دەستەسەرکرنا وی پرسەکە گرێدایی پارتیا وی تەنێ نینە، بەلکی پەیوەندی ب هەمی نەتەوەیا ترکیەیێ ڤە هەیە.