وەزیرێ ناڤخوەیێ ترکیەیێ راگه‌هاند، د خوەپێشاندانێن ستەنبۆلێ دە زێدەتر ژ 1800 کەسان هاتنە بنچاڤکرن.
عه‌لی یەرلیکایا ئیرۆ 27ێ ئادارێ د کۆنفەرانسەکە رۆژنامەڤانی دە دیار کر، د چالاکیێن ل دژی بریارا دوورخستنا ئاکرم ئیمامئۆغلو دە، 150 پۆلیس بریندار بوونە و 1879 خوەپێشاندێر ژی هاتنە بنچاڤکرن.
یەرلیکایا دا زانین ژی، ژ بنچاڤکریان 260 هاتنە گرتن و 468 ژی ب شەرتێ کۆنترۆلا عەدلی هاتنە بەردان. هەروها هین 662 کەس ژی بنچاڤکرینە.
وەزیرێ ناڤخوەیێ ترکیەیێ گۆت، خوەپێشاندان مافەکی دەستوورییە، لێ نابە کو چەک و ئێریشێن ل سەر پۆلیس و سازیان بێن کرن.
شارەدارێ ستەنبۆلێ ئاکرم ئیمامئۆغلو رۆژا 19ێ ئادارێ ب تۆمەتا «گەندەلی» و «ئالیکاریا رێخستنێ» هاتبوو بنچاڤکرن. پشترە ژ ئالیێ 10مین دادگەها جەزایێ گران یا چاگلایانێ ڤە جەزایێ گرتیگەهێ لێ هات برین.
پشتی بنچاڤکرنا شارەدارێ باژارێ مەزنێ ستەنبۆلێ ئەکرەم ئیمامئۆغلو، ل گەلەک باژارێن ترکیەیێ وەلاتی ژ بۆ نەرازیبوونا خوە نیشان بدن، دەردکەڤن قادان.
