سەرۆکێ پارتیا وەلاتپارەزێن کوردستانێ (PWK) موستەفا ئۆزچەلک ئیرۆ 27 ئادارێ نەرازیبوون نیشانی دەربرینا کین، نەفرەت و دژمناتیا ل ھەمبەری کوردان دا و گۆت: “ئالایێ کوردستانێ دێ رۆژەکێ ل ئەسمانێ کوردستانا ئازاد هەژیێت. ئەڤە 100 سالن کو تەڤی شەھیدبوونا ب سەدان ھەزار کوردان و بەردێلێن مەزن و تێکۆشینا مەزن ئالایێ کوردستانێ ل ئەردی نەکەتیە.”
داخویانیا سەرۆکێ PWK موستافا ئۆزچەلک وەهایە:
ئالا کوردستانێ کو ژ ئالیێ سەرۆکێ کۆمارا کوردستانێ قازی محەمەد ڤە رادەستی رێبەرێ گەلێ کورد یێ مەزن مستەفا بارزانی ھات کرن، ئیرۆ ب ڤی ئالای ل سەر پارلەمەنتۆیا ھەرێما فەدەرالا کوردستانا ئیراقێ کو ژ ئالیێ دەولەتا ئیراق، کۆمارا ترکیێ، نەتەوەیێن یەکبوویی و ھەموو دەولەتێن جیھانێ ڤە ب فەرمی ھاتیە ناسکرن، ل با دبت.
ئەم پەیڤا “پەرووک” یا کو ھندەک کەس وەک دەربرینا کین، نەفرەت و دژمناتیا خوە یا ل ھەمبەری کوردان و وەک ئەشکەرەکرنا دووربوونا خوە ژ نرخێن مرۆڤاھیێ ب کار تینن، ڤەناگەرینن؛ ئەڤ ژی دێ ژ بۆ وان ببت رێزەک.
لێ چ ھێز نکارن رێ ل حەرکینا دیرۆکێ بگرن: ئەڤ ئالایێ چ جاران ژ دەستێ مە نەهاتی ستاندن، ھەر چار پارچەیێن کوردستانێ تەقەز دێ ئازاد ببن و ئالایێ کوردستانێ ب سەربلندی ل ھەموو ئەسمانێن کوردستانا ئازاد هەژیێت؛ ل سەر ڤێ یەکێ قەت گومانا مە نینە.
بلا ئەڤ ژ بۆ کەسێن کو دلێن وان ب نەفرەتێ تژییە ببت دەرد.
ئەم بانگ ل پارێزڤانێن ئازادی، دەمۆکراسی، عەدالەت و وەکھەڤیێ یێن ل ترکیەیێ کو خوەدی نرخێن مرۆڤاھیێ نە، ل ھەمبەری کەسێن بێحورمەتیێ ل ئالا و نرخێن نەتەوەیا کورد دکن، ببن خوەدی ھەلوەست و دەنگێ خوە بلند بکن.
