جەهەپە ل ستەنبۆلێ خوەپێشاندانەکە مەزن لدار دخە

 ل دژی گرتنا ئیمامۆغلو، جەهەپە ئیرۆ ل ستەنبۆلێ خوەپێشاندانەکە مەزن لدار دخە. ھەروھا دبێژە: “پەیاما ئیمامۆغلو دێ ب رێیا ژیریا دەستکرد وەرە خوەندن.”

پارتیا کۆماری یا گەل (جەهەپە) راگھاند، ئەو دێ ئیرۆ شەمبیێ ل ناڤچەیا مالتەپەیا ستەنبۆلێ خوەپێشاندانەکا مەزن لدار بخن.

جەهەپێ بانگ ل ھەموو ئالیان کر کو بەشداری خوەپێشاندانێ ببن و گۆت، پەیاما شارەدارێ ستەنبۆلێ ئەکرام ئیمامۆغلو دێ ب رێیا ژیریا دەستکرد هێت خوەندن.

ئیمامۆغلو ل ھەژمارا خوە یا تۆرا جڤاکی “x” گۆت، ئەو دێ ب ھەڤ را د میتینگا ھەری مەزن یا ستەنبۆلێ یا ئازادی، دەمۆکراسی و عەدالەتێ دە بمەشن.

شارەدارێ ستەنبۆلێ ئەکرام ئیمامۆغلو رۆژا 19 ئادارێ ب تۆمەتا “گەندەلی” و “ئالیکاریا رێخستنێ” ھاتبوو بنچاڤکرن. پشترا رۆژا 23 ئادارێ ژ ئالیێ 10ەمین دادگەھا سزایێن گران یا چاگلایانێ ڤە سزایێ گرتیگەھێ لێ ھات برین.

پشتی بنچاڤکرنا شارەدارێ باژارێ مەزنێ ستەنبۆلێ ئەکرەم ئیمامۆغلوو، ل گەلەک باژارێن ترکیەیێ وەلاتی ژ بۆ نەرازیبوونا خوە نیشان بدن، دەردکەڤن قادان.

ب بەردەوامیا خوەپێشاندان و نەرازیبوونێن ل دژی گرتنا ئیمامۆغلوو، ل گۆری وەزیرێ ناڤخوەیا ترکیەیێ، زێدەتر ژ 1800 خوەپێشاندەر ھاتنە گرتن.