وەزیرێ دەرڤەیێ ترکیەیێ دچە پاریسێ و لگەل ھەڤکیفێ خوە یێ فرانسایی دانوستاندنان ل سەر رەوشا سووریەیێ و شەرێ ئوکراینایێ و شەرێ غەززەیێ و چەنەد پرسێن دن دکە.
ئاژانسا ئانادۆلو ل سەر زارێ ھەژمارەکا چاڤکانیێن وەزارەتا دەرڤەیا ترکیەیێ راگەھاند، “وەزیرێ دەرڤەیێ ترکیەیێ ھاکان فیدان ئیرۆ (چارشەمبێ، 2 نیسانا 2025) دچە پاریسێ و لگەل وەزیرێ دەرڤەیێ فرانسایێ ژان-نۆێل باڕۆت دجڤە.”
ل گۆر مەدیایێن ترکیەیێ، تەوەرێن سەرەکی یێن وێ ھەڤدیتنێ دێ رەوشا سووریەیێ، شەرێ رووسیا و ئوکراینایێ، ئەولەھیا یەکیتیا ئەورۆپایێ و پەیوەندیێن ترکیێ و یەکیتیا ئەورۆپایێ بن.
نێزی 800 ھەزار ترکان ل فرانسایێ دژین. د جڤینا وەزیرێن دەرڤەیێن ھەر دو وەلاتان دە، “بەحسا رەوشا وان وەلاتیێن ترک ل گەل ئێریشێن نەژارپەرەستی یێن ل سەر وان” تێ کرن.
ترکیا و فرانسایێ ل سەر سووریەیێ ژی دیتنێن جودا ھەنە. ترکیە ھێزێن سووریەیا دەمۆکراتیک (ھەسەدێ) وەکی رێکخستنەکا تەرۆرستی دبینە، لێ فرانسا وان وەکی ھەڤپەیمانێن خوە د رووبرووبوونا داعشێ دە دبینە.
