مالپەرەکا نووچەیان یا ترکیەیێ راگھاند، ڤێ مەھێ کۆنگرەیا پەکەکێ ژ بۆ دانانا چەکان دێ هێت لدارخستن. بەریا وێ ژی شاندەیا دەم پارتیێ دێ لگەل عەبدوللاھ ئۆجالان و سەرۆککۆمارێ ترکیەیێ بجڤە.
بەریا پێنج مەھان، سەرۆکێ گشتی یێ پارتیا تەڤگەرا نەتەوەپەرەست (مەھەپێ) دەولەت باخچەلی داخواز کر، رێبەرێ گرتی یێ پارتیا کارکەرێن کوردستانێ (پەکەکێ) عەبدوللاھ ئۆجالان پەکەکێ ھلوەشینە. ل سەر ڤێ یەکێ ژی، د 27 شوباتێ دە ئۆجالان بانگ کر کو پەکەکە چەکان دەینە و کۆنگرەیێ لدار بخە و خوە ھلوەشینە.
ھەر چقاس ژ مەھەکێ زێدەتر ل سەر بانگا ئۆجالان دەرباس بوویە ژی، تەڤی کو پەکەکێ ئاگربەست راگھاند، لێ ژ بۆ خوەھلوەشاندنا پەکەکێ، ھەڤسەرۆکێ کۆنسەیا رێڤەبەرا کەجەکێ جەمیل بایک دیار کر، “دڤێت شەرت و مەرجێن تایبەت یێن ژ بۆ لدارخستنا کۆنگرەیا پەکەکێ بێن پەیداکرن. ئەگەر ئەڤ یەک بێ کرن، کۆنگرە دێ هێت لدارخستن و بریارێن عەبدوللاھ ئۆجالان دێ هێن بجھانین.”
مالپەرا خەبەرتورکێ، د راپۆرەکا خوە دە راگھاند، دهێت تەخمینکرن کو د مەھا نیسانێ دە کۆنگرەیا پەکەکێ ب مەبەستا چەکدانینێ بهێت ل دار خستن. بەریا وێ ژی شاندەیا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی) دێ لگەل سەرۆککۆمارێ ترکیەیێ رەجەب تەییب ئەردۆگان بجڤە. ژ بۆ ڤێ مەبەستێ ژی، دهێتە تەخمینکرن کو د رۆژێن پێش دە، سەرۆککۆماریا ترکیەیێ دەمەکێ ژ بۆ جڤینا لگەل دەم پارتیێ دیار بکە.
ل گۆری زانیاریێن وێ مالپەرێ، پشتی جڤینا لگەل ئەردۆگان، شاندەیا دەم پارتیێ دێ دیسا سەردانا گراڤا ئیمرالیێ بکە و جارا چارەمین لگەل عەبدوللاھ ئۆجالان ھەڤدیتنێ بکە. تێ پایین کو ئۆجالان جارەکا دن تەکەزی ل سەر چەکدانینێ بکە و پشتی وێ پەیامێ ژی پەکەکە د ڤێ مەھێ دە کۆنگرەیا ھلوەشاندنێ لدار بخە.
د ھەمان دەمێ دە، رێڤەبەریا کەجەکێ د داخویانیەکێ دە ب بۆنەیا 4ێ نیسانێ، سالڤەگەرا ژدایکبوونا ئۆجالان، راگھاند: “گەل ئێدی دخوازە ئۆجالان ئازاد د ناڤا خوە دە ببینە و پێویستە بێ ئازادکرن.”
ھەر وھا، ھەڤسەرۆکا پارتیا ھەرێمێن دەمۆکراتیک (دەبەپێ) چیگدەم کلچگون ئوچار رەخنە ل دەستھلاتێ گرت و گۆت: “دەولەتا ترکیەیێ ل ھەمبەری پێڤاژۆیا ئاشتیێ بێدەنگ مایە و ئەڤ یەک نایێ قەبوولکرن. دەستھلاتێ ھەتا نھا ل ھەمبەر بانگا ئۆجالان پێنگاڤەکا بەربچاڤ نەهاڤێتیە.”
ئەڤ گەشەدان د دەمەکێ دە تێن کو پێڤاژۆیەکا نوو ل ترکیەیێ و باکورێ کوردستانێ ب مەبەستا چارەسەرکرنا پرسا کورد دەست پێ کریە، پێڤاژۆیا کو دەستھلات وەکە “ترکیەیا بێ تەرۆر” بناڤ دکە، ئالیێ کوردی ژی وێ وەکە “پێڤاژۆیا ئاشتیێ” دبینە.
