بریارە سەرۆکێ ئاک پارتیێ ئیرۆ لگەل دەستەیا کارگێری یا پارتیا خوە بجڤە و دانوستاندنان ل سەر ھندەک مژارێن گرنگ بکە، ھەروەسا بریارە پێشوازیا شاندا دەم پارتیێ ژی بکە.
مالپەرا یەنی شەفەقێ پارڤە کریە کو، بریارە سەرۆکێ ئاک پارتیێ رەجەب تەییب ئەردۆگان پشتی نیڤرۆیا ئیرۆ دوشەمبێ 7/4/2025، لگەل دەستەیا کارگێری یا پارتیا خوە بجڤە.
بریارە د وێ جڤینێ دە بەحسا وان نەرازیبوونان بێ کرن یێن کو پشتی دەستەسەرکرنا سەرۆکێ شارەداریا مەزن یا ستەنبۆلێ ئەکرەم ئیمامۆغلو دەست پێ کرنە.
ھەروەسا دێ بەحسا بانگا جەهەپێ ل سەر بایکۆتکرنا کەلووپەلێن ترکیەیی و دانوستاندنێن پلانکری لگەل دەم پارتیێ هێت کرن و دانوستاندن دێ ل سەر ئابۆری، سیاسەتا دەرڤە و کارێن پەرلەمانی ژی هێن کرن.
یەنی شەفەقێ ھەروەسا گۆت، “یەک ژ تەوەرێن دیار یێن وێ جڤینێ دێ بزاڤێن حکوومەتێ ژ بۆ ئارمانجا ترکیەیەکا بێ تەرۆر بت.” ھەر د وێ چارچۆڤەیێ دە ژی، بریارە د چەند رۆژێن بهێت دە ژ ئالیێ ئەردۆگان ڤە پێشوازیا شاندا ئیمرالیێ یا دەم پارتیێ بێ کرن.
ھوورگلیێن وێ جڤینێ و ئیحتیمالا باندۆرێن وێ یێن سیاسی لگەل ئەندامێن سەرکرداتیێ دکەڤن بەر بەحسکرنێ.
ھەروەسا ئەو ستراتەژیا نوو، کو د وێ پرۆسەیێ دە دهێت پەیرەوکرن، دێ هێت دیارکرن و دهێت چاڤەرێکرن کو ئەردۆگان لگەل دەستەیا کارگێرییا پارتیا خوە ھەلسەنگاندنەکا گشتگیر ل سەر وان مژاران بکە.
