وەزیرێ دەرڤەیێ فرانسایێ ژان نوێل بارۆل هەولێرێ ب فەرماندارێ گشتییێ هه‌سه‌دێ مه‌زلووم عه‌بدی و هەڤسەرۆکا پێوەندیێن دەرڤەیێن رێڤەبەریا خوەسەر ئیلهام ئه‌حمه‌د رە جڤیا و رەوشا سووریەیێ گۆتووبێژ کرن.
وەزیرێ دەرڤەیێ فرانسایێ ژان نوێل بارۆل کو دوهـ 23ێ نیسانێ دانێ ئێڤارێ گهیشت هەرێما کوردستانێ، دەرەنگێ شەڤا بۆری ل هەولێرێ ب فەرماندارێ گشتییێ هێزێن سووریەیا دەمۆکراتیک (هه‌سه‌دێ) مه‌زلووم عه‌بدی و هەڤسەرۆکا دەستەیا پێوەندیێن دەرڤە یا رێڤەبەریا خوەسەر ئیلهام ئه‌حمه‌د رە جڤیا.
ل گۆری زانیاریان، د هەڤدیتنێ دە، ئارامیا ل باکور-رۆژهلاتێ سووریەیێ، خورتکرنا دیالۆگان و رۆلا فرانسا د پێڤاژۆیا ڤەگوهەستنا سیاسی ل سووریەیێ دە هاتنە گۆتووبێژکرن.
پشتی رووخاندنا رەژیما ئەسەد ل سووریەیێ، وەزیرێ دەرڤەیێ فرانسایێ سەردانا شامێ کربوو و تەکەزی ل سەر گرنگیا پاراستنا یەکپەرچەییا ئاخا سووریەیێ و دایینا مافێن سیاسی و ئۆلی یێن پێکهاتەیان کر، ب تایبەتی ژ بۆ کوردان کو هەڤکارێن وان یێن سەرەکەنە د شەرێ ل دژی داعشێ دە.
فرانسا پشتگریێ ددە هەولدانێن ژ بۆ یەکرێزیا هەلوەستا کوردی ل رۆژئاڤایێ کوردستانێ، کو بەر ب سەرکەفتنێ ڤە دچن و بریارە رۆژا 26ێ ڤێ مەهێ کۆنفەرانسەکە کوردی یا بەرفرەهـ ل قامشلۆ وەرە لدارخستن.
