بەرپرسا دەستەیا تێکلیێن دەرڤە یا رێڤەبەریا خوەسەر ئیلھام ئەحمەد، د دەستپێکا کارێن کۆنفەرانسا یەکرێزی و یەکھەلوەستا کورد ل رۆژئاڤایێ کوردستانێ دە ئاخڤی و گۆت: “ئیرۆ رۆژەکا دیرۆکییە. ب سالانە، نە تەنێ رۆژئاڤایێ کوردستانێ، لێ تەڤاھیا پارچەیێن کوردستانێ ل بەندا ھاتنا رۆژەکا وەھا بوون.”
ئیلھام ئەحمەد سپاسیا ئامادەبوونا نوونەرێ سەرۆک بارزانی، حەمید دەربەندی کر، ھەروھا سپاسیا وان پارتی، ھێز و رێخستنان کر کو بوونە پشتەڤانیەکا خورت ژ بۆ کۆنفەرانسێ و ژ بۆ یەکرێزی و یەکیتیا کورد.
بەرپرسا دەستەیا تێکلیێن دەرڤە یا رێڤەبەریا خوەسەر گۆت: “ئەم دخوازین رێخستنێن مە یێن سیاسی د چارچۆڤەیەکێ دە بگھیژن رێکەفتنەکێ، ب تایبەتی د قۆناغەکا وھا دە کو رۆژئاڤایێ کوردستانێ پشتی خەبات و تێکۆشینەکا درێژ، گھشتیە ئاستەکێ کو پێویستە چارەنووسا خوە دیار بکە.”
ئیلھام ئەحمەد گۆت: “ئەم دخوازین لگەل دەولەتا سووریەیێ چارەنووسا خوە دیار بکن و ھەروھا د دەستوورێ دە مافێن خوە مسۆگەر بکین.”
ئاماژە ب وێ یەکێ ژی کر کو ئەو پشتگریەکا خورت ژ کوردێن ھەر چار پارچەیێن کوردستانێ دبینن، ب تایبەتی پشتگریا خورتا سەرۆک بارزانی ژ بۆ یەکیتی و یەکرێزیا کورد ل رۆژئاڤایێ کوردستانێ، ھەر وھا پشتگریا عەبدوللاھ ئۆجالان ژ ئیمرالیێ و رێخستنێن دن یێن کوردستانێ ژ بۆ کو کورد ل سووریێ بگھیژن مافێن خوە.
ئیلھام ئەحمەد گۆت: “ئەم گوھ ددن دەنگێ گەلێ خوە کو داخوازا یەکرێزی و یەکھەلوەستیێ ژ مە دکە و مە ژی ل سەر ڤی بنگەھێ کۆنفەرانس ل دار خست. ئەم دخوازین بگھیژن ئەنجامەکێ. دەمەک درێژە گوفتووگۆ د ناڤبەرا ئالیان دە ل سەر ڤێ مژارێ تێ کرن و ئیرۆ ئەڤ رێکەفتن و لھەڤکرن د کۆنفەرانسێ دە تێ راگھاندن.”
کۆنفەرانس ئیرۆ 26ێ نیسانێ، دەمژمێر 10:00 ب بەشداریا نێزیکی 50 پارتیێن سیاسی یێن کورد ل رۆژئاڤایێ کوردستانێ و سازیێن جڤاکا سڤیل ل قامشلۆیێ دەست پێ کر.
ئارمانج ژ ڤێ کۆنفەرانسێ، راگھاندنا یەکھەلوەستیا کورد و ئاڤاکرنا شاندەیەکا ھەڤپارا کوردییە ژ بۆ دانووستاندنێ لگەل حکوومەتا نوو یا سووریێ ژ بۆ مسۆگەرکرنا مافێن گەلێ کورد.
